Mynsaw jur u khynnah skul St Edmund’s ba shah tynrah ha ka Scooty kaba pynher sted

Syllad | The Rising MeghalayaAugust 24, 2023

Uwei u khynnah skul ka St Edmunds Higher Secondary School u la ngat ha ka jingmynsaw kaba jur hadien ba u la shah tynrah ha ka scooty kaba la pynher sted bha mynta ka sngi Palei ha ka por 10:55 mynstep hajan Anton Hall, Laitumkhrah, Shillong.

Katkum ki dur video ba la sakhi lyngba ka CCTV la iohi ia une u khynnah uba la tip kyrteng kum u Edmund Marpan 17 snem rta katba u dang thmu ban jam sha shiliang ka surok hadien ba u la shah tynrah ha kane ka scooty kaba la pynher sted bha ba la niah da uwei u samla 22 snem rta uba la tip kyrteng kum u Eukratis Mylliempdah uba dang pule BA first semester.

Katkum ba la sakhi ha ka video la iohi ia u Marpan uba la sied kumba katto katne pruh bad u nongniah ruh u la kyllon sha madan hadien jong kane ka jingjia.

Na ka liang ki pulit ki pyntip ba u Marpan u la don ha ka jingshitom kaba kham jur na ka bynta jong ka kjat ka mon bad katto katne na ki bynta jong ka khlieh.

Hadien jong kane ka jingjia la pynkit noh mar mar ia u Edmund shapoh Woodland Hospital, hynrei na ka liang kiba haiing hasem ki la pynkynriah noh shapoh Guwahati na ka bynta ki lad jingsumar.

Na ka liang ki pulit ki la register iaka case bad kila kem noh ia u nongniah ka scooty.