Mynjur u Lat iaki 6 tylli ki ain ba sahteng ka KHADC

Syllad | The Rising MeghalayaOctober 25, 2024

U Lat ka Jylla Meghalaya u CH Vijayashankar u la ai jingmynjur da kaba buh iaka muhor jong u ban pynlong Ain ia ki hynriew tylli ki Bill kiba la sahteng la slem ba la mynjur da ka Khasi Hills Autonomous District Council (KHADC).

Ia kane la pyntip da u Chief Executive Member (CEM) ka KHADC u Bah Pyniaid Sing Syiem haba kren sha ki lad pathai khubor ha ka 24 tarik u Risaw ha ka jingiadon lang ki dkhot ka Executive Committee.

Kine ki hynriew tylli ki Bill ba la aijingmynjur da u Lat ki kynthup ia ka The Khasi Hills Autonomous District (Administration of Elaka) (Amendment) Bill, 2023, The Khasi Hills Autonomous District (Nomination and Election of the Lyngdoh, Myntri, Lyngdoh Raid and Sordar Shnong and Administration of Sohiong Lyngdohship) Bill 2023, The Khasi Hills Autonomous District (Regulation and Administration of Land) (Amendment) Bill, 2023, The United Khasi-Jaintia Hills District Fishery (Amendment) Bill, 2023, The Khasi Hills Autonomous District (Khasi Social Custom of Lineage) (Amendment) Bill, 2023 bad The Khasi Hills Autonomous District (Trading by Non-Tribals) (Amendment) Rules, 2023.

U CEM u la ong ba ka Khasi Hills Autonomous District (Administration of Elaka) (Amendment) Bill, 2023 ka long kaba kongsan bha namar ba ka wad ban ithuh ia ka jingtreikam jong ki Seng Longkmie bad ki Seng Samla hapoh k Dorbar Shnong.

Katkum ka jingong jong u, kane ka Bill kan iarap ruh ban weng ia ka jingeh da kaba pynthikna ha kaba iadei bad ka jingwan tuid ki briew kiba napoh bad na shabar ka Jylla kiba hap ban register ia lade bad ki Dorbar Shnong lada ki wan sah kum ki nongshongwai hapoh u pud u sam jong ka.