Mynjur pynbeit pud ka Assam Meghalaya ha ki 6 jaka

Syllad | The Rising MeghalayaMarch 30, 2022

Ka jylla Meghalaya bad Assam haka sngi ba Ar ki la soi ia ka soskular ha nongbah Delhi ban pynkut noh ia ka jingiakajia pud kaba la neh mynta la palat 50 snem ha ki 6 tylli ki jaka kiba don hapdeng kine ki artylli ki jylla.

U Myntri Rangbah ka jylla Meghalaya, u Conrad K Sangma bad u Myntri Rangbah ka Assam, u Himanta Biswa Sarma ki la soi ia ka soskular ha ryngkat ka jingdonlang u Myntri ka kam pohiing ka Ri, u Amit Shah.

11 ngut ki nongmihkhmat na ka sorkar Meghalaya bad 8 ngut na Assam ki la don ryngkat ha kane ka jingialang kaba la pynlong ha ka ophis jong ka Ministry of Home Affairs.

Ka jingsoi ia kane ka soskular kaba khatduh ka long ka jingsah kynmaw ha ka histori jong ka thaiñ shatei lam mihngi, ong u Amit Shah.

“Mynta ka sngi ka dei ka sngi kaba kyrpang ha ka thaiñ NE naduh ba u Modi u la long u Myntri Rangbahduh, u la trei borbah khlem shongthait na ka bynta ka thaiñ Northeast”, u la ong.

Hadien ka jingsoi ia ka soskular, u Myntri Rangbah ka jylla, u Conrad K Sangma u la ong, “ka long ka sngi sah kynmaw na ka bynta ka jylla Meghalaya bad Assam bad na ka bynta ka thaiñ North East baroh kawei namar ka jingiakajia pud kaba la 50 snem bad ka jingiaknieh jaka ruh ka la don ha ki thaiñ khappud, ngi la shim ia ka sienjam na ka bynta ban wad ia ki lad ki lynti ban pynkut noh ia kine ki jingeh.”

U la ong ba ka jingsoi ia ka soskular ka long hadien ba ladep ban soi ia ka Memorandum of Understanding (MoU) hapdeng ka Meghalaya bad Assam ha ka 29 tarik Kyllalyngkot 2022.

Ki 6 tylli ki jaka kiba ladep ban iapynbeit ki long Tarabari (4.69 sq km), Gizang (13.53 sq km), Hahim (3.51 sq km), Boklapara (1.57 sq kms), Khanapara-Pilangkata (2.29 sq kms) bad Ratacherra (11.20 sq kms), bad ka jingiar ka long 36.79 sq kms.

Hadien ka jingiakren kaba thikna, bad hadien ba la don ki jingleit jngoh ia kine ki jaka da ki regional committees, la ioh jingtip ba 18 sq kms kan leit sha Meghalaya bad 18 sq km kan leit sha Assam.

Shuh shuh u Conrad K. Sangma u la pynthikna ba baroh artylli ki jylla kin bteng ban iatreilang na ka bynta ki 6 tylli ki jaka kiba dang sah bad kita ki long ka Langpih, Bordwar, Nongwah Mawtamur, Deshdemoria, Khanduli, Umkhyrni Psiar, Block I bad Block II.

U la ai ruh ka jingkhublei ia u myntri ka kam pohiing ka Ri na ka bynta ka jinglam lynti ka jong u, bad dei na ka daw jong u, ba kine artylli ki jylla ki tylli lang ban shim ia ki sienjam kiba pynthikna ia ka suk ka saiñ.

“Nga ai ka jingkhublei ia u Myntri Rangbah ka Assam na ka bynta ki kam kiba la lah ban pyndep na ka liang ka sorkar Assam. Nga ai khublei ruh ia ki dkhot ka regional committee kiba la lah ban pynurlong ia kane ka kam bad ia baroh kiba la treilang haduh ba ngin poi sha kaba kut. Kane ka kam kan nym urlong khlem ka jingiatreilang ki committee na baroh artylli ki jylla,” ong u Conrad.

Haba iohi ba kane ka long ka rai kaba biang tam, u Conrad u la ong, “Ngi ngeit skhem ba ka bynta jong kiwei pat ki 6 tylli ki jaka kin sa urlong noh shen bad ngin ioh ia ka suk ka saiñ ha baroh kawei ki khappud.”