Mynjur ka sorkar jylla ban wanrah ia ka engineering wing ha ka tnat pulit

Syllad | The Rising MeghalayaSeptember 12, 2023

Ka sorkar Meghalaya hapoh ka jingialam u Myntri Rangbah u Conrad K Sangma mynta ka sngi ba Ar ka la ai ka jingmynjur halor ka jingtyrwa ban wanrah ia ka engineering wing hapoh ki headquarter jong ka tnat pulit ha ka nongbah Shillong.

Na ia liang u Conrad Sangma u la ong ba ki pulit ki don ia shibun ki jaka treikam ha kylleng ka jylla, bad kumta khnang ban plielad ia ka tnat pulit ba kan lah ban khmih bad pyniaid ia kine ki jingtei bad ki ophis bapher bapher ka long ka donkam ban noh ia ka  tnat engineering wing. 

U la ong ruh ba ka jingbym don ia kane ka tnat engineering wing, ka tnat pulit ka la hap ban bud ia kiba bun ki kyndon ain kiba bam por bad kiba iatyngkhuh bad ki tnat bapher bapher wat ban leh tang ia ki kam kiba rit ba riat, kata wat tang ia ki kam maramot jong ki kamra sum lane ia ki thanad ne ki jaka shong jong ki pulit ne barrack.

Kumta ruh ula ong ba ia kiba kum kine ki jingtreikam mynta yn khmih bad peit noh da ka tnat engineering wing.

Nalor kata une u Myntri u pyntip ruh ba na ka liang ka sorkar kham hashwa ka la wan shakhmat ha ryngkat ka rai ban mang bad buh katto katne ka pisa hapoh ka jingkhmih jong ki Police (SP) bad Deputy Commissioner (DC) jong man la ki district khnang ba kin lah ban pyndonkam ia ka pisa ha ki jingdonkam ba kyrkieh ban leh ia ki kam maramot hapoh ki district level khnang ban lah ban pynbiang ia ki jingdonkam jong ki tnat pulit.

Shuh shuh u CM u la ong ruh ba kane ka jingshim rai mynta ka sngi kan plielad ban shim ia ki rai ia kiba yn pyntreikam ha ka rukom kaba dei bad ban pynthikna ban pynurlong ia ki jingdonkam ba kongsan kiba kum ki dkhot ka tnat pulit ki donkam hapoh ki district bad haduh ki grassroot level.