Mynjur ka Sorkar ia ka project ban shna ia ka phlim shaphang u Tirot Sing Syiem

Syllad | The Rising MeghalayaAugust 21, 2025

Ka sorkar Meghalaya ka la ai ka jingmynjur ia ka project ban shna ia ka phlim kaba la ai kyrteng “On the Life and Times of U Tirot Sing Syiem” ka phlim kaba iathuh ia ka khana shaphang ka jinglong jingim jong une u Syiem ba shlur ka jaidbynriew Khasi uba la iakhun pyrshah khlem jingriej pyrshah ia ka jingsynshar jong ka sorkar Bilat.

“Khnang ban pyniaid shakhmat ia ka jingthmu ka jong ngi ban rakhe pyndon burom ia ki riewshlur, ki khlawait bad kito kiba iakhun khlem jingriej na ka bynta ka jinglaitluid jng ngi, ka Tnad Arts and Culture ka la ai ka jingmynjur ban pyniaid shakhmat ban shna ia ka phlim kaba kyrteng ‘On the Life and Times of U Tirot Sing Syiem’, ong u Myntri ka Tnad Arts and Culture u Bah Paul Lyngdoh haba kren sha ki lad pathai khubor ha ka 20 tarik Nailar.

U Bah Paul u la pynbna ruh ba la shaniah ha u nongshna phlim ba pawnam ka Jylla u Bah Pradip Kurbah ban pynkhreh ia ka script bad ban khmih ia kiwei pat ki jingtip kiba iadei bad kane ka project.