Mynjur ka Sorkar ia ka policy die scrap ia ki kali rim; yn weng haduh 13000 ki kali na ki surok

Syllad | The Rising MeghalayaMay 2, 2025

Ka Sorkar Jylla ka la mynjur ia ka policy ban die scrap noh ia ki kali rim (Vehicle Scrappage Policy) bad ba kan pynkhuid ne weng noh ia haduh kumba 13000 tylli ki kali rim na ki surok khnang ban pynduna ia ka jingpynmih tdem jaboh kaba ktah ia ka mariang.

Haba kren sha ki lad pathai khubor hadien ka jingialang ka kynhun Myntri haka 1 tarik Jymmang, u Myntri bad Nongaiktien ka Sorkar u Bah Paul Lyngdoh u la ong, “Ki kali rim ki bym iahap shuh ban iaid ha ki surok kin hap hapoh kane ka policy. Baroh  ki don haduh kumba 13000 tylli ki kali ha Meghalaya ki ban shah weng noh na surok katkum kane ka policy kaba thymmai. Na kine 5000 tylli ki dei ki kali sorkar bad 8000 ki kali jong ki briew shimet.”

U la ong ba ka jingioh nong kaba khraw lyngba kane ka policy ka long ban ailad ia ka sorkar ba kan pynduna ia ka jingpynmih tdem jaboh lyngba ki kali, pynduna ia ka jingthied umphniang kali bad ka ban pynshlur ban shna bad pynmih ia ki tiar lyngba ki kali rim.”

“Kumba ka long mynta ka Shillong ka don haduh kumba 2,76,262 tylli ki kali kiba la register. Mynta ngin sdang ban weng ia ki jingsngewkhia kiba iadei bad ka jingjakhlia ka lyer ba la pynmih da ki kali ki bym treikam shuh bad kiba la rim,” ong u Myntri uba la bynrap ruh ba kane ka dei ka sienjam kaba iasyriem bad kaba la leh ha ka ri baroh kawei.

Hynrei, da kaba khmih ia ka jinglong jingman ha ka liang ka ioh ka kot jong ki paidbah ka jylla, ngin pynbeit ia kane ka kam da kaba sdang shwa na ki kali sorkar kiba la kynjoh 15 snem ne palat. Kane ka mut ba kumba 5000 tylli ki kali sorkar kin hap hapoh kane ka policy die scrap, katba ha kaba iadei bad ki kali ki riew shimet la rai ban pyntreikam shwa tang ia kito ki kali kiba la kynjoh 35 snem shaneng kiba don mynta kumba 8000 tylli.