Mynjur ka sorkar ia ka Meghalaya Street Vendors Scheme na ka bynta ka bit ka biang jong ki nongshong dukan madan

Syllad | The Rising MeghalayaOctober 19, 2023

Da kaba pyntreikam ia ka jingbthah jong ka sorkar pdeng, ka sorkar jylla haka 18 tarik Risaw ka la ai ka jingmynjur ia ka Draft Meghalaya Street Vendor Scheme 2023, kaba thmu ban khmih na ka bynta ka jingbit jingbiang jong ki nongdie jingdie madan ha ki jaka sor.

Haba kren sha ki lad pathai khubor hadien ka jingialang na ka liang u nongaiktien ka sorkar MDA u Bah Paul Lyngdoh u la ong ba ka jingthmu ba kongsan jong ka sorkar ka long ban pynbiang halor ka jingdonkam ban ailad ia ki nongshong dukan madan ba kin kamai japoh bad ruh ban pynthikna halor halor ka shongsuk shongsain, ka jinglait na ka jingkhapngiah, ka jingshngain jong ki nongleit nongwan bad kiwei kiwei. Kane ka long ruh khamtam hadien ba la sakhi ia ka jingjia pluh ding ba dang shen ha kaba ki nongdie madan ki la long ka daw jong ka jingpoi slem jong ki kali pynlip ding ban tem ia ka ding kaba pluh ha ki bynta jong ka Khyndailad, Shillong.

Haba kdew halor ki bynta jong kane ka skhim, u Bah Paul u la ong ba kane ka kren ha kaba iadei bad ki town vending committee ki ban pynithuh  ia ki nongshong dukan madan kiba dei hok. Kum ka nuksa, kine ki nongshong madan  ki dei ban don ia ki EPIC card ba la ai da ka  Election Commission of India (ECI) nalor ki certificate ban pyni ba u/ka ki dei kiba shong ba sah ha Meghalaya la kumno kumno na ka bynta lai snem kynthih.  Ki nongshong madan ki dei ban don ia kajuh ka jaka shong dukan madan haduh 6 bnai kynthih, ki dei ban don ia ki Trade Licence ha ki jaka kiba hap shabar ki 3 tylli ki Normal Area kiba khmih da ka Shillong Municipal Board.

Nalor kata u la ong ruh ba ki don haduh palat 3000 ngut ki nongshong madan ha ki rud surok ha ka Nongbah Shillong, bad bynrap ruh ba na ka liang ka sorkar ka don ia ka jingthmu ban shna ruh ia ka jaka iew na ka bynta jong ki nongshong dukan madan.

Kane ka rai jong ka Sorkar Jylla ka dei kaba iaid kat kum ka Street Vendors (Protection of Livelihood and Regulation of Street Vending) Act, 2014, kaba la mynjur da ka Sorkar India ha u snem 2014, kaba la bthah ia baroh ki Jylla ka Ri ba kin thaw noh iala ki jong ki Rule khnang ban the kyndon ia ka jingiashong dukan madan bad ban ai jingiada ia ka hok jong ki nongshong dukan madan.

Shuh shuh une u Myntri u la ong ba ki don ruh ia ka jingthmu ban pynlong ia ka sorbe ia ki nongshong dukan madan bad ban pyniaid ia ki aplikeshon ka ban long kat kum ki kyndon bala buh bad ruh ban ithuh ia ki jaka ba lah ban shong dukan madan bad ki bym lah.