Mynjur ka Sorkar ia ka Meghalaya Film Tourism Policy ban kyntiew ia ki kam shna phlim, T.50 lakh yn kyrshan iaki Khasi Jaintia Garo

Syllad | The Rising MeghalayaJuly 11, 2025

Ka Sorkar jylla ka la shim ia ka sienjam kaba kongsan ban kyntiew ia ki kam shna phlim ha ka jylla da kaba ai ka jingmynjur ia ka Meghalaya Film Tourism Policy 2025.

Na ka liang u Myntri ka Tnad Tourism u Bah Paul Lyngdoh u la ong ba kane ka policy ka thmu ban pynlong ia ka Meghalaya ka jaka pdeng na ka bynta ki kam shna phlim hapoh ka thain Shatei Lammihngi bad ban tei ia ki jingtei kiba donkam ha kylleng ka jylla.

Haba kren sha ki lad pathai khubor hadien ka jingialang jong ka Kynhun Myntri, u Bah Paul u la ong ba ia ka Draft Meghalaya Film Tourism Policy 2025 la pyllait da u Myntri Rangbah ka jylla u Conrad K Sangma naduh kine ki lai bnai ba ladep ha kaba na ka liang ka sorkar ka la pan ia ka jingai jingmut ba kongsan na baroh ki kynhun kiba don bynta ha kane ka kam.

U la ong ba ki la ioh pdiang haduh palat 200 tylli ki jingai jingmut na ki kynhun bapher bapher kiba kynthup ia ki nongshna bad ki nongpynmih phlim ka jylla ia kiba la pynrung lang hapoh kane ka policy.

“Mynta ka sngi ngi la wanrah ia ka policy ha ka jingialang ka kynhun Myntri. Ka la don ka jingiakren kaba sani bha hadien ba ka kynhun Myntri ka la ai ia ka jigmynjur ia kane ka policy. Kane ka dei ka sienjam kaba khraw nangne shakhmat ban pynthikna ba ngin plie ia ka Meghalaya ha ka rukom kaba heh bha lyngba ka ‘film tourism,” u la ong.

Nalor kata u la ong ruh ba ka Meghalaya Film Tourism Policy ka kwah ruh ban pynleit jingmut halor ki jingshisha ba ka Meghalaya ka don ia shibun ki lad ki kabu ban khring ia ki nongshna phlim na kylleng ki ri ka pyrthei.

“Ngi kwah ban pynshlur ia ki kam pynmih phlim ha ki kyrdan National bad Internationlal bad ruh ban pynlong ia ka Meghalaya kum ka jaka pdeng na ka bynta ki kam shna phlim ha ka thain Shatei Lammihngi bad ruh ban tei ia ki jingtei kiba donkam ha kylleng ka jylla,” ong u Bah Paul.

U la pyntip ruh ba ka sorkar kan sa thaw ia ka Film Facilitation Cell” na ka bynta ban wanrah ia ka jingiatreilang hapdeng ki Tnad sorkar, kynthup ia ka Tnad Tourism, Arts & Culture bad ka DIPR ban kyntiew ia ka Meghalaya kum ka jaka kaba paka tam na ka bynta ki kam shna phlim, kata la ki dei ki Regional, National ne wat ki International.”

U Myntri u pynbna ruh ia ka jingkyrshan subsidy kaba kot haduh T.1 klur lane 25% na ka jingpynlut ia ka phlim sha kito ki phlim kiba pyndonkam da ki ktien ba kham kongsan jong ka ri bad ki ri ka pyrthei ha kaba ka jingring ia ki phlim ka dei ban long 75% ha Meghalaya.

Kumjuh haba pynbna ia ka jingkyrshan ia ki cinema kiba don hapoh ka jylla, u Bah Paul u la ong, “Nga sngewkmen ban pyntip sha phi ba ki nongpynmih phlim Khasi, Pnar bad Garo kin ioh ia ka jingkyrshan pisa kaba haduh T.50 lak ha kaba ki nongshna phlim ki lah ban ioh shisien man la ka ar snem.”

Shuh shuh u la bynrap ba kan don ruh ka jingkyrshan pisa na ka bynta ban shna bad pynmih ia ki TV serial bad ki hsow, web series bad ki original show ia ki ban pyni lyngba OTT platform Hello Meghalaya App, kaba dei ka OTT platform ba la bei tyngka da ka sorkar hapoh ka ri.