Mynjur ka Sorkar ia 3 tylli ki Rule ban wanrah ka jingbishar ka ba shai halor ki kam bymman

Syllad | The Rising MeghalayaJuly 11, 2025

Ka kynhun Myntri ka Sorkar Jylla haka 10 tarik Naitung ka la ai ka jingmynjur halor ki lai tylli ki Rule kiba thmu ban pynjanai bad wanrah ka jingtreikam kaba shai bad ba khuid haba bishar halor ki kam bymman hapoh ka jylla.

Kine ki Rule ba la mynjur ki kynthup ia ka Meghalaya e-Shaksha Management Rules, 2025, Meghalaya Electronic Processes Issuance Service and Execution Rules 2025 bad ka Meghalaya Guidelines Community Services 2025. Kine ki Rule la khmih lynti ba kin iarap ban pynjanai ia ka jingpyniaid halor ki sakhi ba la lum lyngba ki kor electronic, ban pynbeit ryntih ia ki rukom pyniaid ha ki kam bishar khadar bad ban pyndonkam da kiwei pat ki jait jingpynsaja halor ki kam bymman kiba rit ba ria.

Haba kren sha ki lad pathai khubor hadien ka jingialang ba la pyniaid da u Myntri Rangbah ka Jylla u Conrad K Sangma, u Commissioner & Secretary ka Tnad kam Pohiing, u Bah Cyril Diengdoh u la ong ba ia kine ki Rule la aijingmynjur hadien ka jingiasyllok bad ka Iingkashari Meghalaya High Court bad ka long shibynta na ki kam kiba dang iaid ban pyntreikam ia ki ain kiba thymmai halor ki kam bymman-ka Bharatiya Nyaya Sanhita, Bharatiya Nagariksuraksha Sanhita bad ka Bharatiya Sakshya Adhiniyam kaba la sdang treikam naduh ka 1 tarik Naitung 2024. 

U Bah Cyril u la ong ba ka Meghalaya e-Shaksha Management Rules, 2025 kan pynthikna halor ka jingshngain ia ki sakhi satar kiba la thep ne upload kum ki video bad ki dur ki dar ha ki mobile application bala tip kum ka e-Shaksha. Ia kine ki sakhi yn pyniasoh sha ka CCTNS system bad ICJS system ka ban pynmih ia u unique ID bad pynthikna ba kan ym don ka jingpynduh pyndam.

“Ia baroh ki sakhi satar ba la lum ha ki kor electronic, la ki dei ki video, ki dur la thep da ka jingshngain ha ka mobile app ba la tip kum ka e-Shaksha ka ban aijingiada lyngba u code ba 16 nombor bad hashtag bad ia kine yn pyniasoh sha ka  CCTNS system bad ICJS system (Interoperable Criminal Justice System) ki ban treikam kum ki sakhi haba leit sha iingkashari kum ki sakhi ha ka jingtian bishar halor ki kam bymman,” u la batai.

Ha kaba iadei bad ka Meghalaya Electronic Processes Issaunce Service and Execution Rules 2025, u Bah Cyril u la ong ba kane ka Rule ka shah ban pyndonkam ia ki kor electronic haba khot hajir, warrant lem abd kiwei ki kam ba iadei bad ka kashari ka ban pynduna halor ka jingdonkam ia ki kot ki sla bad kiwei kiwei.

U Commissioner & Secretary u la kdew ruh halor ka jingthmu jong ka Meghalaya Guidelines Community Services 2025, ka ban pyntreikam ia ka jingshakri ia ka imlang sahlang kum ka jingpynsaja halor ki kam bymman kiba rit ba ria lyngba ka jingpynkhuid ia ki jaka paidbah, ki hospital bad ki jaka pule ptuhi.