Mynjur ka Sorkar ban thaw ia ka Meghalaya Rural Development Services Recruitment Board

Syllad | The Rising MeghalayaNovember 6, 2024

Ka Sorkar Jylla ha ka 5 tarik Naiwieng ka la mynjur ia ka jingtyrwa ban thaw ia ka Meghalaya Rural Development Services Recruitment Board (MRDSRB).

Ia kane ka jingtyrwa jong ka Community & Rural Development (C&RD) la wanrah ha ka jingiakren jong ka Kynhun Myntri kaba la pynlong online ia kaba la pyniaid da u Myntri Rangbah ka Jylla u Conrad K Sangma na Tura.

Haba kren sha ki lad pathai khubor hadien ka jingialang ha Shillong, u Myntri Sorkar uba dei u nongaiktien ka MDA u Bah Paul Lyngdoh u la ong ba ka jingthaw ia ka MRDSRB kan iarap ia ki kam ki jam jong ka Tnad C&RD, ha kaba ka jingtyrwa thungkam ia ki ophisar Junior Rural Development Officer (JRDO) lyngba ka expert committee jong ka Board.

“Ki dkhot jong ka service (JRDO) ki dei ki post graduate bad post graduate diploma holder na ki jaka pule kiba paw. Yn jied ia ki lyngba ki eksam bapher bapher bad yn sa phah ia ki sha ki Block kum ki Junior Rural Development Officer,” u la ong da kaba bynra, “Ngi la dep pynpaw teng ba kin sa don ki JRDO bad ka jingdon jong ki kan long 59 ngut bad ia ka jingdon jong ki post ba donkam ruh  la dep ban pynthymmai bad mynjur.”