Mynjur ka Sorkar ban pynkylla ia ka Service Rule ka tnad Fisheries

Syllad | The Rising MeghalayaAugust 27, 2025

Ka Kynhun Myntri ka Sorkar Jylla ha ka 26 tarik Nailar ka la ai ka jingmynjur ban pynkylla thymmai ia ka Service Rule jong ka Tnad Fisheries.

Haba kren sha ki lad pathai khubor hadien ka jingialang, u Myntri Rangbah ka Jylla u Conrad K Sangma u la ong ba lyngba kane ka jingpynkylla, ka sorkar ka la weng noh ia ka kyndon kaba buh ia ki nongtrei ba ki dei ban don kumba san snem ka jingshakri ba sah ha ka kam ba kin ioh ia ka hok ban kiew kyrdan hapoh ka Tnad Fisheries.

Kane ka rai ka thmu ban pynioh ia kajuh ka lad ban kiew kyrdan na ka bynta baroh ki nongtrei kiba dei hok ban ioh, kata khlem da khein ia ka por kaba ki la shakri ha ka kam.

“Kane ka kyndon kam ju don ha ka Tnad, kumta ngi la weng noh ia ka na ka Tnad Fisheries ruh namar ngi sngew ba ki nongtrei wat hadien ka jingshakri kaba bun bun snem, hynrei tang namar kane ka kyndon ba san snem ki la duh ia ka lad ban kiew kyrdan ia kaba nga sngew ka long ka bym iahap satia. Ngi la weng noh ia kane ka kyndon ban long kumjuh ia baroh,” ong u Myntri Rangbah.