Mynjur ka Sorkar ban kyntiew ia ka bai nong sngi; yn myntoi palat 85,000 ngut ki nongtrei bylla

Syllad | The Rising MeghalayaJanuary 11, 2025

Ka jingialang jong ka Kynhun Myntri ka Jylla kaba la long ha ka 10 tarik Kyllalyngkot ha Polo Orchid Sohra ka la mynjur ban kyntiew ia ka bai nong sngi jong ki nongtrei bylla ha ki kam tei jingtei bad ban pynkhlain ia ka jingioh lum khajna ka ban aijingmyntoi ia ki palat 85,000 ngut ki nongtrei bylla sngi ha ka Jylla Meghalaya.

Da kaba shim ba ka dei ka jingshim rai kaba kongsan jong ka sorkar, u Myntri Rangbah ka Jylla u Conrad K Sangma u la ong ba ka jingsiew kaba rit eh ia ki nongtrei kiba hap hapoh ka thup jong kiba la tbit bha (highly skilled) mynta kin ioh T.645 na ka T.585, kiba la nang (skilled) T.605 na ka T.530, kiba shu pdeng (semi skilled) T.565 na ka T.474 bad ki bym pat nang bha kin ioh T.525 na ka T.419.

U la ong ruh ba baroh ki dei ban pyntreikam ia kane ka dor thymmai bad lada ym bud ryntih ia kane ka jingbthah la kyntu  ba kin phah da ka jingujor sha ka Tnad Labour khnang ban leh ia kaba donkam katkum ka ain.

Nalor kata u la pyntip ruh ba ka Kynhun Myntri ka la mynjur na ka bynta ban pynkylla ia ki kyndon jong ka ‘The Meghalaya Buildings and Other Construction Workers Regulation and Employment Condition Rules, 2008. ‘

“Phi tip ba ngi don ka jinglum khajna bad ia kane ka pisa nangta la pyndonkam na ka bynta ka jingmyntoi jong ki nongtrei, kiba la pynrung kyrteng ha ka sorkar. Kumba 80,000 ne 85,000 ngut na ki, ki don kiba la pynrung kyrteng. Ki don ki jingmyntoi bapher bapher kumba phi ioh jingmyntoi ha ki jinsiew na ka bynta ki lad jingsumar, kiwei kiwei ki jingduna ha ki dkhot met bad phi ioh jingsiew na ka bynta ka jingpule jong ki khynnah kiba pule ha ki skul bad ki kolej – kumta ngi la pynbha ia kita ki jingmyntoi bad kumta da kata ka jingpynkylla, ki pisa kiba leit sha ki longiing bad ki nongtrei kiba la register kin ioh ia ka jingmyntoi kaba kham heh mynta.

Ka kynhun myntri ka la rai ban pynkiew ia ki jingmyntoi na ka bynta ki nongbylla kiba la pynrung kyrteng hapoh jong kane ka kyndon,” u la ong.