Mynjur ka Sorkar ban ai wai ia ka jaka kaba 273 akar jong ka MeECL ban kyntiew ia ki project tourism

Syllad | The Rising MeghalayaJune 14, 2025

Ka Kynhun Myntri ka Sorkar Jylla haka 13 tarik Jylliew ka la mynjur ia ka jingtyrwa ban ai wai ia ka jaka kaba 273.41 akar jong ka MeECL sha ka Tnad Tourism na ka bynta 60 snem ba kan pyntreikam ia ki project bapher bapher kiba iadei bad ki kam jngohkai.

Haba aijingkren sha ki lad pathai khubor hadien ka jingialang, u Myntri ka Tnad Tourism u Bah Paul Lyngdoh u la ong, “Nga sngewkmen ban pyntip sha phi ba khnang ban pynmih pisa lyngba ki jaka kiba shu ieh shrah jong ka MeECL bad ki shnat jong ka na ka bynta ban kyntiew ia ki project kam jngohkai da kaba shu wai ia ki jaka bad iasam ia ka jingioh nong, ka Kynhun Myntri mynta ka sngi ka la mynjur ia ka jingtyrwa ha kaba ka Tnad bording lyngba ka MeECL ka la rai ban ai wai ia ka jaka kaba 273.41 akar sha ka Tnad Tourism.”

Katkum ka jingpynpaw ka jong u, kine ki jaka ki kynthup ia ka IB campus, ka jaka na Le junction ha shilynter ka Dyke, Ri Shad Sngi haduh Nongsder, Police Station bad baroh ki jaka kiba don ha lyndet ka skul MeECL, ka jaka ha lyndet ka NHRDC haduh NESAC, ka thain Block V haduh dewlynnong Lum Pongdeng.

Pyllait u Myntri Rangbah ia ka yacht ‘Meghalinor’ kaba nyngkong eh ha pung Umiam

“Kane ka jingaiti ia ki jaka na ka Tnad bording sha ka Tnad Tourism kan long katkum ka policy jong ka Sorkar ka ban long ha kaba nyngkong da ka jingaiwai kaba 60 snem bad kaba lah ban pynjlan biang sa 30 snem,” u la bynrap.

Haba kylli, u Bah Paul u la ong ba ka Tnad kan siew T.1 na ka bynta shi akar hynrei ia ka bhah jong ka Tnad bording kan long 90% kum ka bai wai na ka bynta 60 snem bad kaba lah ban pynjlan sa da 30 snem.”

U la ong ba kane ka jingtyrwa ka long ban kyntiew shuh shuh ha kaba iadei bad ka kam jngohkai ha ka jylla. Na ka liang ka sorkar kan wanrah ruh ia ki 5 Star Hotel bad sdang pyntreikam ia ka Lake Cruise Services ha kine ki shi snem ki ban wan.