Mynjur ka Meghalaya-Assam ban sieh mawpud ha ki 6 tylli ki jaka khappud shwa ka Independence Day

Syllad | The Rising MeghalayaJune 3, 2025

Ha ka sienjam kaba kongsan kaba thmu ban weng ia ki jingeh kiba la sahteng la slem bah ha kaba iadei bad ki kam iakajia pud, ka sorkar Meghalaya bad Assam ki la mynjur ban pyndep noh ia ka jingsieh mapud ha ki hynriew tylli ki jaka kiba la dep ban iakren pynbeit shwa ka 15 tarik Nailar kaba dei ka sngi rakhe laitluid jong ka ri (Independence Day).

Ia kane la pyntip da u Myntri Rangbah ka Jylla u Conrad K Sangma hadien ka jingialang bad u Myntri Rangbah ka Assam u Himanta Biswa Sarma haka 2 tarik Jylliew ha Guwahati.

Ka jingialang ka la pynthikna ba na ki 12 tylli ki jaka khappud kiba don hapdeng ka jingiakajia hynriew tylli la lah ban ia pynbeit hapdeng kine ki ar jylla hadien ba la ia soi ia ka MoU ha u bnai Kyllalyngkot 2022 ha ka jingia don lng u Myntri kam pohiing ka sorkar pdeng u Amit Shah ha ka nongbah Delhi.

Haba kren sha ki lad pathai khubor ha ka jingiadon lang u Conrad Sangma, u Himanta u la ong ba napdeng kine ki hynriew tylli ki jaka ba la dep iasoi soskular kin pyndep ia ka jingsieh mawpud ha ki santylli ki jaka shwa ka Independence Day.

U la ong ruh ba ka la don ka jingbym ia sngewthuh jingmut ha kawei na kine ki hynriew tylli ki jaka, kata ha Gijang bad Tarabari ha kaba ka Meghalaya ka kwah ia kawei ka shnong ba la ai sha ngi ban pynphai pat, hynrei ki la ai ka jingkular ba kin sa ai bujli da kawei pat ka jaka kaba heh mar kumjuh. Ngi la pan por shitaiew ban shong pyrkhat bad ngin sa pyntip sha ki.

U Myntri Rangbah u pyntip ruh ba ka jingiakren pynbeit pud ha ka kylla kaba ar na ka bynta ban pynbeit ia ki hynriew tylli ki jaka kiba don hapdeng ka jingiapher jingmut kan dang bteng.

Ki hynriew tylli ki jaka kiba dang don hapdeng ka jingiapher jingmut ia kiba la bynshet sha ki regional committee ba kin wad ia ki lad ki lynti ban lah ban pynbeit ki kynthup ia ka Langpih, Borduar, Nongwah-Mawtamur, Deshdoomreah, Block-I & Block-II, Psiar-Khanduli.

Ha katei ka jingialang ka kynhun na Meghalaya kiba la ia don lang ki kynthup ia u Myntri ka tnad Tourism u Bah Paul Lyngdoh bad u Chief Secretary Bah DP Wahlang nalor kiwei kiwei ki heh Sorkar. Kumjuh la synran lang ia u Myntri Rangbah Himanta Biswa Sarma da ki Myntri Sorkar bad ki heh ophisar.