Mynjur ka India-Pakistan ia ka jingsangeh iasiat; yn iakren biang 12 tarik

Syllad | The Rising MeghalayaMay 10, 2025

Ka India bad ka Pakistan ki la mynjur ban pynjari ia ka jingsangeh iasiat hadien ka jingiakynad bad ki jingiather markylliang kiba sdang hadien ka jingpynphai kylliang ka India halor ka jingthombor ba shyrkhei jong ki lehnoh ha Pahalgam, ha Kashmir kaba la shim ia ka jingim jong ki 26 ngut ki riew paidbah.

U Secretary kam bar ri ka India u Vikram Misri u la pynthikna halor kane ka jingpynjari ia ka jingsangeh iasiat ha ka jingkren sha ki lad pathai khubor ha kaba iadei bad ka Operation Sindoor.

“U Director General ka Military Operation ka Pakistan ula iakren bad u Director General of Military Operations ka India mynta ka sngi Saitjain ha ka por 3:35 janmiet ha kaba ki la ia mynjur ba baroh arliang kin sangeh iaka jingiasiat bad ka jingialeh ki shipai napoh ryngkew, na suin bad duriaw kumjuh ka ban sdang treikam naduh ka por 5 baje janmiet mynta ka sngi,” ong u Misri.

“La pynmih ia ka jingbthah na baroh arliang ban pyntreikam ia kane ka jingiasngewthuh jingmut. Ki Director General jong ka Military Operation kin pynlong biang ia ka jingiakren ha ka 12 tarik Jymmang ha ka por 12 baje mynsngi,” bynrap u Secretary.