Mih shakhmat ki bor shnong ban iarap wad ia ki shi kurim na Indore kiba jah ha Sohra: CM

Syllad | The Rising MeghalayaMay 30, 2025

U Myntri Rangbah ka Jylla u Conrad K Sangma haka 29 tarik Jymmang u la ong ba ki la shim ia baroh ki sienjam ban lapdien ia ki shikurim ki nongwan shangkai pyrthei na Indore, Madhya Pradesh kiba la jah rngai ha ka thain Sohra ha kaba mynta na ka liang ki shnong ki thaw ruh ki la iasnohkti lang ha kane ka jingwad.

“Ngi kyrmen skhem ba kane ka jingwad ia kine ki shikurim kiba jah rngai kan long kaba seisoh bad ka jingpyrshang borbah ka jong ngi ka dang iai bteng bad da lade hi nga la bishar bniah ia baroh ka jinglong jingman bad ngi la pyrshang ia kaba bha tam ban lapdien ia kine ki shijur kiba la jah rngai ha ka thain Sohra naduh kine ki 3-4 sngi ba la dep,” ong u CM haba kren sha ki lad pathai khubor.

U la ong ba kane ka jingjia ia kine ki shijur kiba wan shangkai sha kane ka jylla Meghalaya ka long kaba sngewsih shisha bad ba u la ioh ruh ban iakren bad u Myntri Rangbah ka Madhya Pradesh bad ioh pdiang ruh ia ka phone call na ka Ministry of Home Affairs halor kane ka jingjia.

U Conrad u la ong ruh ba baroh ki bor pyniaid District bad ki bor pulit ki la trei khlem shongthait ban lapdien ia kine ki shijur da kaba bynrap ba wat ki shnong ki thaw ruh ki la mih shakhmat ban iashim bynta lang ha kane ka jingwad.

“Ngi la pyndonkam lut ia baroh ki kor ki bor jingstad kiba ngi don ban iarap ha kane ka jingwad. Hynrei, namar ba ka dei ka aiom slap bad ba kane ka thain Sohra ka dei kaba la tip bha halor ka jingjur slap, kumta ka la pynshem jingeh shibun ha kaba iadei ba kane ka kam, hynrei ngi la pyrshang ia kaba bha tam ban pynthikna ba ngin lapdien pat ia kine ki shijur,” u la ong.

Haba pynpaw halor ki jingshem na ki jingtohkit, u Conrad u la ong, “Kine ki shijur ki la leit shangkai sha kylleng ki jaka bad ia ka scooty ba shu wai ba la pyndonkam da kine ki shijur la lap narud surok bad kaba pyni ba lehse ki lah ban leit iaidkai sha kawei na ki jaka iaidkai ba long riat bad kiba syntuid bad don jingma khamtam ha kane ka por slap.

“Kumta ruh ka jaka ban pynlong ia ka jingwad ka long kaba iar, namar kata kumba nga ong ngi la trei borbah, kata naduh ki bor pyniaid district, ki bor pulit bad ki bor shnong bad ngi kyrmen ba ngin lah ban lapdien ia ki,” ong u Myntri Rangbah.

U la bynrap ruh ba ka thain Sohra bad ka Jylla hi baroh kawei ki ju niew ia ki nongwan shangkai pyrthei kum shibynta jong kiba haiing hasem bad kane ka paw shai kdar lyngba ka jingmih shakhmat jong ki nongshong shnong ban iarap lem ha kaba iadei bad kane ka jingwad ia kine kiba jah rngai.

Ha ka sngi Balang ba la lah la phah ia ka kynhun Search & Rescure Team ha ryngakt ka jingkyrshan da ki ksew pulit (K9 Unit) ki drone na ka NESAC nalor ka kynhun Special Operation Team (SOT) ban pynlong ka jingwad sha ka thain Nongriat- Pyndemdkhar -Mawlakhiat.