Mih noh u Dr Jemino kum u nongialam ka UDP bad Honorary Adviser ka Sorkar

Syllad | The Rising MeghalayaJune 1, 2025

U General Secretary ka Seng United Democratic Party (UDP) bad MLA barim ka Nongthymmai constituency, u Dr Jemino Mawthoh u la pynbna ia ka rai iehnoh kam jong u na ka na ka UDP kaba u la don mynta la bun bun snem.

Ha ka shithi ba la phah sha u president ka party u Bah Metbal Lyngdoh, u Dr Mawthoh u la pynpaw ia kane ka jingiehnoh kam jong u kum ka daw shimet ki bym lah kiar. U la pynpaw ruh ka jingsngew nguh ia ka party halor ki lad ki kabu kiba u la ioh ha ki jingtreikam  ha kine ki snem kiba la leit noh.

U Dr Jemino u la bat kum u Working President ka party naduh u snem 2014, bad kum u General Secretary naduh u snem 2016 ha kaba u la pynpaw ka jingsngew nguh ia ka jingkyrshan bad ka jingiatreilang kaba ka party ka la ai na ka bynta ban shakri ia ka constituency bad ka jylla hi baroh kawei.

Nalor kata une u MLA barim u la iehnoh ruh ia ka kam kaba u bat  kum u Honorary Adviser ka Tnad Planning, Investment Promotion and Sustainable Development ka sorkar  Meghalaya.

Haba pynthikna halor kane ka khubor iehnoh kam, u nongialam ka UDP bad ka Liang Pyrshah ha KHADC u  Bah Titosstarwell Chyne u la ong ba um don ia ka jingtip kaba thikna halor ki daw kiba pynlong ia u Dr Jemino ba un shim ia kane ka rai iehnoh kam. 

Haba kylli, u Bah Titos u la ong ruh ba baroh kiei kiei ki long kiba iaid beit iaid ryntih hapoh ka party.

Watla katta ki la don ki khubor kiba la dep pynpaw lypa ba u Bah Jemino u lah ban pyniasoh bad kiwei pat ki kynhun sain pyrthei.