Mih madan u Chairman ka JHADC, jop ka Evergreen Ladwahwapung, iakhaid artylli ki jingialehkai 3rd Division ka EJHDFA

Syllad | The Rising MeghalayaSeptember 13, 2024

Ka Evergreen Ladwahwapung kala jop da 1-0 iaka Shymplong, katba ar tylli kiwei pat ki jingialehkai kila iakhaid haka 3rd Division Football ka East Jaintia Hills District Football Association (EJHDFA) kaba long ha madan Diengshynrum haka 13 tarik Nailur.

Ka namjop ka Evergreen Ladwahwapung kala wan long ruh hadien ba u Chairman ka Jaintia Hills Autonomous District Counil (JHADC) Sankey Shangpung ruh ula mih madan ban ialehkai na ka kynhun bad kane kala ai mynsiem iaka kynhun baroh kawei. Ia kane shikol la thep u Testme Dkhar bad kane ka kol kala neh haduh ba kut ka jingialehkai.

U kyrwoh na ka EJHDFA ka ong ba une u MDC u dei artad uba sngewtynnad bha ia ka jingialehkai phutbol bad u la synniang shibun ki jingiarap ia ki club kiba hap hapoh ka constituency jong u.

Haka jingialehkai kaba bud hapdeng ka Wahsanphaw SCSC pyrshah iaka Wahsarang SC ka jingiakhun kala kut khlem don mano mano ba ioh pynkhih jar.

Kawei pat ka jingiakhun hapdeng ka Tongseng Youth SSC pyrshah iaka Wapungshnong SC, kane ka jingiakhun kala kut da kaba iakhaid mar 2-2

Iaki 2 tylli ki kol jong ka Wapung shnong la thep da u Wanphai Dkhar (2) bad u Helpme Dkhar (63). Katba iaki 2 tylli ki kol jong ka Tongseng la thep da u Jimmy Amse (6 ) bad u Nongpynthymmai Kyndoh (34).