Mih ka longkmie shakhmat ban pan iaka hok ki khun na ka FKJGP bad ka One Stop Centre ha Khliehriat

Syllad | The Rising MeghalayaNovember 21, 2021

Kawei ka longkmie ba kynnoh shah iehbein ha u lok jong ka kala mih shakhmat ban pan jingiarap iaka hok ki khun na Federation of Khasi Jaintia and Garo People (FKJGP) Khliehriat Circle bad na ka One Stop Centre, Khliehriat, East Jaintia Hills District.

Kane ka longkmie kala kynnoh ba u lok jong ka uba shong ba sah ha katei hi ka district, ula lehbeiñ iaka bad lai ngut ki khun khlem da ai bai bam iaki khun ki kti mynta la hynniew bnai bad mynta ka im haka jingkordit.

Katkum ka jingujor sha ka One Stop Centre, kane ka longkmie kala ong ba mynta la hynniew bnai une u lok ula pynduh bai bam iaki khun. Kane ka longkmie kala ong ba mynta ki im haka jingim kaba kordit ban siew bai skul khun, bai siew bai wai nalor ban pynbiang iaka bam ka dih ki khun.

Kane ka longkmie katkum ka shithi ujor sha ka One Stop Centre kala dawa ba une u kpa ki khun jong ka, u dei ban ai bhah iaki khun na ka jingdon jingem jong u khnang ba kin ioh iala ka hok.

Ka FKJGP Khliehriat Circle hadien ba kane ka longkmie kala ujor mar mar kala pyntip sha ka One Stop Centre, ha ka jingiadei bad kane khnang ban pynioh jingiarap ia kane ka longkmie bad kitei ki lai ngut ki khun.