Mih ka jingiapyrta slogan markylliang ha ka jingleit iakhih ka BJP hakhmat Congress Bhavan

Syllad | The Rising MeghalayaSeptember 2, 2025

Ka jingiapyrta slogan hapdeng ki dkhot ka BJP bad ka Congress ka la khluit puk ha ka nongbah Shillong hadien ba ki dkhot ka BJP haka 1 tarik Nailur ki la leit ban pynlong da ka jingiakhih hakhmat ka Congress Bhavan.

Kane ka jingiakhih ba la pynlong da ka BJP Meghalaya ka la wan long hadien ka jingkren pynjah burom da u dkhot ka Congress na Bihar pyrshah ia ka kmie jong u Myntri Rangbahduh ka ri u Narendra Modi.

Hynrei, na ka liang ka Congress ka la kyntait ia kane ka jingkam jong ka BJP da kaba kynnoh ba kane ka jingiakhih ka dei ka buit sain pyrthei ban pynklet ia ki paidbah halor ka mat kaba iadei bad ka kam tuh vote jong ka seng BJP.

Na ka liang u president ka BJP Yuva Morcha u Mewaker Lyngdoh u la pynksan ia kane ka jingiakhih da kaba ong ka dei ban pynpaw pyrshah ia ka jingkren bein ia ka kmie jong u Myntri Rangbahduh da u dkhot ka Congress u Mohammed Rizvi uba la shah kem noh h ki pulit.

U Bah Mewaker uba la ai khublei ruh ia ki bor pulit kiba la kem noh ia u Rizvi u la pynbna ba ka BJP ym tang ba kan iakhih hakhmat ophis ka Congress hynrei ka thmu ruh ban pynlong da ka jingiakhih hakhmat ka ophis jong ka Trinamool Congress (TMC) namar ba ki ngeit ba kam shym la don kano kano ka jingpynshitom pyrshah ia ka MP ka TMC ka Mahua Moitra halor ka jingkynthoh pynjah burom pyrshah ia u Myntri kam pohiing jong ka ri u Amit Shah.

Ka BJP Meghalaya ka la mudui ruh da ka ejahar hakhmat u SP ka East Khasi Hills ba dawa ban leh ia kaba donkam pyrshah ia ka Moitra katkum ka ain. U la ong ruh ba ka BJP ka ieng na ka bynta ka roi ka par, ka jingsuk bad ka jingiatylli ha ka ri baroh kawei.

Haba pynrem ia kane ka jingleh jong ka BJP, u Secretary ka MPCC u Bah Manuel Badwar u la shim ia kane ka jingiakhih jong ka BJP kum ka buit ban pynklet ia ki paidbah namar ki kam buittuh kiba ka BJP hi ka donkti.

“Ka dei ka buit sianti na ka liang ka jong ki ia kaba nga ngeit ba ki kwah burom bad pynklet ia ki paidbah halor ka mat tuh vote jong ka party namar mynta ka kynti ka ri baroh kawei ka la kren shaphang ka kam tuh vote jong ka BJP,” ong u Bah Manuel da kaba kdew halor ki kam tuh vote jong ka BJP ha ki ilekshon bapher bapher, da kaba kdew halor ki khubor halor ki kam leh thok ha palat 70 tylli ki seat da kaba kynnoh ruh ba ka BJP ka la pyrshang ban knieh jubor ia ka rukom synshar paidbah.

U la ban jur ruh ba ki jingeh ba shisha kiba ka ri ka ki akynduh ka long halor ka jingkyrduh kam kyrduh jam bad ka jingbym ia ryngkat ha ka jingsam ia ka bhah ia kaba ka BJP ka pyrshang ban pynklet ia ki paidbah.

U Bah Manuel u la kynnoh ruh ia ka BJP halor ka jingpynkylla kam sain pyrthei da kaba pynshong nongrim halor ka niam, ka jaidbynriew bad ka longiing longsem da kaba thmu pyrshah ia ka longiing jong ki Gandhi kaba la kit ia ki jingeh na ki jingshah kynnoh kaba la slem bah.

Ha kaba iadei bad ka jingialang ba dang shen jong ka BJP ha Shillong, u Bah Badwar u la kam ba ka jingiakhih jong ka BJP ka dei kaba la kynshoit da ki nongialam jong ki bad ka dei ka jingpyrshang ban pynsngewbha ia ki heh jong ka party jong ki ym ia ki jingsngewkhia kiba shisha.

U la ban jur ruh ba ka Congress kan iai bteng ban ieng na ka bynta kiba duk tam bad kan ym shah ialam bakla ha ki buit sianti jong ka BJP. U la pynpaw ruh ka jingkyrmen ba ki paidbah ki tip bha ia ki jingleh jingkam jong ka BJP bad ba kin kyntait ia ka politik jong ka jingpyniapait iapra ka jong ki. U la batai lypa ruh ba ka rai jong ki paidbah ha ki ilekshon ki ban wan kan pyni ia ka jingmih kaba phet, bad ka lynti jong ka synshar paidbah kan ieng.

“Ka jingkhih ha baroh kawei ka ri ka iaid sha kata ka lynti. Nga ngeit ba haduh 140 klur ki briew ki la sdang ban sngewthuh mynta ba ka BJP kam shym la leh ei ei, bad ka BJP ka la pynkhie spah tang na ka bynta ki katto katne ngut ki briew, bad ka ri ka la nangkylla duk ha ka liang ka ioh ka kot,” ong u Bah Badwar da kaba bynrap, “Ka Meghalaya ka dei kawei na kine ki jylla kiba iakynduh ia kane ka jingeh, bad na ka bynta jong ki ban wan iakhih hangne ka dei kaei kaei kaba dei ban pynrem jur bad ngim kwah ba kum kane kan dang wan jia biang hadien habud.