Mih jyndat biang ka liang pyrshah na iingdorbar bym ioh iatai ia ka mang tyngka

Syllad | The Rising MeghalayaJune 26, 2025

Ki MDC ka liang pyrshah ka Khasi Hills Autonomous District Council (KHADC) haka sngi Palei ki la mih jyndat biang napoh ka iingdorbar hadien ka jingshah khanglad ha u Chairman u Bah Strong Pillar Kharjana ban iashim bynta ha ka jingiatai ia ka mang tyngka halor ka nongrim ba kim shym la phah satia ia ki kyrteng ba kin ioh iashim bynta.

“Ka rai ka jong nga kam dei satia kaba shah liang. Nga la buh por 4 baje janmiet jong ka 24 tarik Jylliew ban phah ia ki kyrteng jong ki dkhot kiba kwah ban iashim bynta ha ka jingiatai ia ka mang tyngka. Kane ka dei ka rukom kaba ju leh baroh shikatta,” ong u Bah Kharjana haba pynbna ia kane ka rai hashwa ban sdang ia ka jingiatai ha ka sngi kaba kut jong ka Dorbar Lyiur.

Haba ka liang pyrshah ka la pan ka jingpynshai, u Chairman u la ong, “Haba ia ki kyrteng ym shym la phah kumno ngan ailad ba phi iashim bynta.”

Katkum ka jong ong ka jong u, ki don tang san ngut ki dkhot kiba la phah ia ki kyrteng jong ki na ka bynta ban iashim bynta ha ka jingiatai ia ka mang tyngka.

Kumta ban pynpaw ka jingbym sngew iahap ia kane ka rai jong u Chairman, u nongialam liang pyrshah u Bah Titosstarwell Chyne lem bad baroh ki dkhot ka liang pyrshah ki la ia mih paidbah kum ka dak ka jingpyrshah.

Ha ka sngi ba Ar ba la lah, ka liang pyrshah ka la mih jyndat na ka iingdorbar ban pynpaw pyrshah ia ka rai jong ka Executvie Committee ka Voice of the People Party (VPP) ban wanrah ia ka mang tyngka kaba beain kaba long pyrshah ia ki riti dustur.

Ka liang pyrshah ka la pyrshah ia ka jingkynthup lang ia ka supplementary demand jong u snem 2024-25 ha ka mang tyngka ba pura jong u snem 2025-26, ia kaba ki la pynpaw ba ka long kaba beain bad pyrshah ia ka riti dustur.