Meghalaya Games: Jop ka EJH pyrshah iaka NGH haka football kut noh ka Gymnastic

Syllad | The Rising MeghalayaMay 4, 2022

Ka dei ka khubor kaba bha iaka East Jaintia Hills ba haka jingiakhun football haka lympung bah ka Jylla- Meghalaya Games 2022 kala jop 7-0 kol pyrshah iaka North Garo Hills haka jingiakhun quarter final ba nyngkong kaba long ha Madan Heh haka sngi ba Ar.

Ha lyndet kane ka namjop ka dei ka jingioh khyrwit hattrick ka Rushia Dkhar lyngba ki kol kiba kala la thep (33′, 50′, 58′).

Ia kane ka jingiakhun la pynlong ha Mawlai Madan Heh bad SAI Centre.

Ha kawei pat ka jingiakhun ka West Khasi Hills kala pynliem South West Khasi Hills bad ka Eastern West Khasi Hills kala jop West Jaintia Hills haka pre-quarterfinals jong ki kynthei ne women. Baroh ar tylli kine ki jingiakhun kila wai da 2-0 kol.

Haba phai pat sha kaliang ki shynrang haka U-21 ka East Khasi Hills kala jop da 13-1 kol pyrshah South Garo Hills haka pre-quarters.

Shuh shuh haka Basketball kaba long ha NEIGRIHMS Indoor Stadium, ka West Khasi Hills ka lahduh naki kynthei bad shynrang kala rung sha ka semifinal. Na kaliang ki kynthei kin aireng pyrshah iaka Ri Bhoi, bad na ki shynrang ruh kin aireng iaka Ri Bhoi

Ka West Jaintia Hills bad East Khasi Hills kin aireng pyrshah mar kylliang kynthup kynthei bad shynrang.

Kiwei kiwei ki jingialehkai kiba la sdang haka sngi ba Ar ki kynthup iaka boxing, taekwondo, weightlifting, badminton, tennis, shooting, archery nalor ka football bad basketball.

Kiwei kiwei ki jingialehkai kiba kynthup iaka athletics, cycling, karate, swimming, table tennis bad kiwei kin sdang ha ka sngi Balang.

Ha Madanrting, haka jingialehkai WUSHU, u Dorian Dean Nongrum u la khur iaka takma ksiar haka sub-junior boys below-42kg category, u Femi Rymbai wan nyngkong haka sub-junior boys below-36kg category bad ka Marvisha Sohklet ka wan nyngkong haka  sub-junior girls below-42kg. U Deputy Chief Whip, Pyniaid Sing Syiem u kongsan ula sam iaki khusnam sha ki nongjop.

Ha SAI Indoor Training Hall, lasam iaki medal haka jingialehkai gymnastics kaba la sdang naduh ka sngi Nyngkong da u Meghalaya State Olympic Association Working President John F Kharshiing haka jingiadonlang ka Vice-President Matsiewdor War Nongbri bad kiwei kiwei.