Meghalaya Games 2025: Yn sdang ka jingialehkai football hadpeng ki district na Rilum Garo haka 15 tarik

Syllad | The Rising MeghalayaJanuary 14, 2025

Ki kynhun ialehkai phutbol kynthei bad shynrang kiba mihkhmat iaki 11 tylli ki District jong ka Jylla kynthup iaka West Jaintia Hills District kila wan poi ha Jowai naka bynta ka Meghalaya Games 2025.

Ia baroh ki kynhun ialehkai la pdiang sngewbha da ki bor synshar Disrtict kumjuh ka ophis u District Sports Officer, West Jaintia Hills ha madan Lad Mukhla haka step 14 tarik Kyllalyngkot.

La ai pdiang burom ia uwei pa uwei u nongialehkai phutbol da ki jingai sngewbha kynthup ka ryndia tlem, ka pla ialehkai, bad ka shabi kaba don iaka dur Mascot u Kiang.

U Bah Aiborlang Syiemlieh u Head Coach na West Khasi Hills u la pynpaw ka jinghun halor ka jingpdiang sngewbha bad ka jinglong paralok ba la pynbiang da ka district ba pdiang ïa kane ka lympung.

Ki jingialehkai phutbol kan sdang haka 15 tarik Kyllalyngkot, tang na bynta ki shynrang kata haka kyrdan Under-17 Boys, ka South West Garo Hills pyrshah iaka East Garo Hills haka 10.00 baje mynstep, ka South West Khasi Hills pyrshah iaka East Khasi Hills haka por 12.00 baje mynstep, ka East Jaintia Hills pyrshah iaka Ribhoi haka por 2.00 baje nohphai sngi.