Mar ar kol thep u Himanshu bad Ronaldkydon, lam khmat ka Nangkiew Irat haka miet iakhein point ka SPL

Syllad | The Rising MeghalayaAugust 29, 2025

Katba nang jam shakhmat ka jingiakhun, katta ruh ka kynhun ialehkai jong ka Nangkiew Irat, ka la tbeh ialade sha ka thong ban iaknieh ban rah ia ka nam kum ka lahduh jong ka lympung ialehkai phutbol bna nam tam ka jylla ka Shillong Premier League kaba pyniaid ka Shillong Sports Association bad ia ki dak ki shin jong kine baroh, ki wan ba kin mihpaw haka 28 tarik Nailar, hadien ba kane ka kynhun, da ka sur ialehkai ba khlain, ka la lah ba kan pynliem noh ia ka Sawmer Sc da 5-1.

Ki namtam ha kane ka kynti iakhun naka bynta ka Nangkiew Irat dei u Himanshu Patil (15’, 42’), bad u Ronaldkydon L Nonglait (46’, 50’) la lam khmat ia ka kynhun ban ioh ban ia thep mar ar kol , bad sa shi kol la ioh ban thep ia ka da u Banshanlang Nongdhar (48’)

Shikol naka bynta ka Sawmer na kane ka jingiakhun la thep ia ka da u Bisharlang Mawthoh ha ka minit kaba 18.

Kane kan dei ka sien jop kaba lai ia ka kynhun ialehkai jong ka Nangkiew Irat ha kane ka samoi ialehkai ba mynta jong ka SPL, kaba pynlong ia ka ba kan khur 9 point bad ban lah ban iai neh halor duh ka miej iakhien point, katba na ka liang ka Sawmer kane ka namrem ka pynlong ia ka ba kan hiar pat sha ka kyrdan kaba 7.

Ka kol kaba nyngkong kaba la thep da ka Nangkiew Irat lyngba u Himanshu kadei kaba u la ioh ban rah shakhmat ia ka bol ha kaba u la sah satang para marwei bad u rang ap kol ka Sawmer u Pyrshangbanbha Dkhar.

Pynban kane ka jinglah ban tam shakhmat da shi kol da ka Nangkiew Irat kam shim la neh slem namar ba u Dibinroy Nongspung u la ioh ban pynbuh ia ka bol sha u Bisharlang bad kumba 6 yard na ka kol, dain u la khyrwit ban ioh pynkhih ia ka jar na bynta ka Sawmer.

Hadien kane, ka Sawmer ka la pyrshang ba kan iai pynneh ia ka sur ialehkai ka jong ka, hynrei u Himanshu sa shisien u la ioh ia ka kabu ksiar ban thep pat ia ka kol kaba ar, na ka bol ba la pynbuh sha u da u Edyvenson Dhar.

Haba wan ban bteng ia ka kylla miet, marsien ia sdang, ki player k Nangkiew Irat ki la lap ba ioh thep syndet haduh lai tylli ki kol tang hapdeng san minit, kaba hangne ka la khang lad khang lynti ia ka kynhun ialehkai ka Sawmer ban lah ban wanphai biang sha ka lynti jong ka jingiakhun bad haduh kaba kut ban hap ban pdiang ia kane ka namrem.

Ka jingiakhun haka 29 tarik Nailar lah ban ong ba kan dei ka Super Friday Match, namar kat kum ka prokram kaba la pynbeit, ka jingiakhun kan long hapdeng ki artylli ki kynhun ba khraw nam khraw kyrteng ha kane ka lympung katta ka Mawlai SC kan iakhun pyrshah ia ka Langsning FC kaban long ha ka por 4:30 nohphai sngi.