Mang ka Sorkar Pdeng T.6 klur ban thied smartphone ia ki nongtrei Anganwadi ha Meghalaya: Paul

Syllad | The Rising MeghalayaMarch 29, 2025

Ka Sorkar Pdeng ka la mang pisa haduh palat T.6 klur na ka bynta ban thied ia ki 6162 tylli ki smartphone na ka bynta ki nongtrei Anganwadi hapoh ka jylla Meghalaya.

Haba pyntip ia kane ha ka 28 tarik Lber u Myntri ka Tnad Social Welfare u Bah Paul Lyngdoh u la ong,

“Nga sngewkmen ban pynbna halor ka jingmang ia ka pisa kaba kot palat T.6 klur da ka Ministry of Women and Child Development na ka bynta ban thied ia ki 6162 tylli ki smartphone ia kiba yn pyndonkam da ki nongtrei Anganwadi ki jong ngi khnang ban pynjanai ia ka rukom treikam bad ka jingai jingshakri sha ki paidbah nongshong shnong ka Jylla Meghalaya.”

U la ong ruh ba kawei ka smartphone ka shongdor T.10,000/- bad yn sam sha ki nongtrei Anganwadi ha kaba kut jong u bnai Iaiong 2025.