Mana ka District Magistor ban pyntuid jakhlia ha Wah Umkhrah bad Umshyrpi

Syllad | The Rising MeghalayaJune 12, 2025

Ka District Magistrate, East Khasi Hills, Kong RM Kurbah, IAS, ka la pynmih da ka hukum ban mana tyngeh ia ka jingpyntuid beain ia ki jakhlia sha ki Wah Umkhrah bad Wah Umshyrpi.

Ia kane ka hukum la pynmih hadien bala ioh iaka kaiphod naka Meghalaya State Pollution Control Board (MSPCB) kaba la pynlong iaka jingjurip halor ka jinglong ka Wah Umkhrah bad Umshyrpi, ha kaba la pynpaw ba kam don ka jingkiew ha ka jingkhuid jong ka um, khamtam ha ki bynta ba kynthup ia ka Umshyrpi hajan Law College, Jingkieng Umshyrpi, bad ka Umkhrah ha Demthring, Umkhrah ha Umkaliar, Umkhrah hajan ling Shohdoh (Mawlai Phudmuri) bad Umkhrah ha Mawpdang Mawlai.

Ka kaiphod ka la kdew ba ka jingpyntuid beain ia ki jakhlia na ki septic tank, ka jingbret pathar ia ki niut sha ki wah bad surok kala pynjakhlia iaka um. Bynrap sa ka jingbun palat jong ka Biological Oxygen Demand (BOD) bad Faecal Coliform, ka dei ka dawbah kaba pynjakhlia ia ki um bad ka lyer, kaba buh jingma ruh ia ka koit ka khiah jong ki paidbah nongshong shnong kane ka district.

“Ma Nga, i Kong R. M. Kurbah, IAS, District Magistrate, East Khasi Hills District, Shillong, lyngba ka bor kaba la pynkup ha nga hapoh ka Kyndon 163 BNSS, nga buh ka jingmana ia ka jingpyntuid beain ia ki jaboh bad kiwei ki jakhlia na ki septic tank, iing, karkhana kali, jaka iadie iathied, bad kiwei bad ka jingkawang/bret ia ki niut sha ki surok/um,” la ong ka District Magistrate haka hukum kaba la pynmih bad kane ka hukum kan treikam mardor.

Kino kino kiba pynkhein ia kane ka hukum kin ngat ha ka jingshah pynshitom hapoh ka Kyndon 223 jong ka BNS bad shim ki lad ka Ain katkum ki Kyndon jong ka Water (Prevention and Control of Pollution) Act, 1974 bad ka Air (Prevention and Control of Pollution) Act, 1981.