Mana ban pyniap pathar ia ki dohum ha Wah Umngot

Syllad | The Rising MeghalayaMarch 1, 2021

Ka Synjuk ïada Wah Umngot ka seng kaba la thaw da ki hynriew tylli ki shnong, ka Niriang, Moodymmai, Madur, Phlonginkhaw, Lumkudung bad Nongjrong ban iada iaka Wah Umngot kila pynbna paidbah ba kala mana pyrshah ban pyniap pathar ia ki dohum dohpnat haka bynta jong ka wah Umngot kaba hap hapoh u pud u sam jong ki.

Kane ka synjuk kaba la thaw naduh u snem 2002 ban iakhun ban pynneh pynsah iaka sawdong sawkun ka Wah Umngot bad ki doh um dohpnat, kala mana ia baroh kiba wan kai kumjuh ia ki rawon kiba sngewtynnad ban wan khwai ba kim bit ban pyniap pathar iaki dohum dopnat da kaba pynbthei bom, wieh dawai ba kynthup iaki shoh kharu, Jaïur, tutia ban pyndonkam da ki jar bad ban tong da ki sasi nalor kiwei kiwei ki lad kiba ktah iaki dohum dohpnat.

La rai ba lada lap ïa kino kino kiba leh pyrshah bad pynkheiñ ïa kine ki kyndon kin hap haka jingpynshitom kaba tyngeh.

Kane ka synjuk haka sngi Saitjain kala pynlong iaka jingialang ha madan Lawyrtap kaba don ha khappud ka Shnong Niriang kaba hap ha West Jaiñtia Hills District bad khappud jong ka Shnong Nongjrong kaba hap ha East Khasi Hills District. Ha kane ka jingïalang ki dkhot ka synjuk ki la ïoh lad ban phylliew jingmut bad pyni ïaki nia ki jutang halor kumno ban nang pynkhlaiñ shuh shuh ban ïada ka wah.

Ïaka jingïalang la pynïaid da u President u Watar Passah bad u General Secretary ka synjuk u Bah Ebormi Siangshai ula ïathuh ïaka jingsdang bad ka rukom treikam jong ka naduh u snem ba la seng ïaka ha u snem 2000 da ki nongialam Shnong jong ki Hynriew Shnong.

Ha kane ka sngi ka synjuk ka la pynthymmai ruh ïaki dkhot nongkitkam ba kynthup ïa u President Bah Watar Passah, Vice President Bah Chirup Pariat, General Secretary Bah Haunihiwot Pariat, Assistant Secretary Bah Renald War, Finance Secretary Rev. Kamai Pariat bad Treasurer Bah Sainlang Laloo.