Man ka sngi ka dei kaba kyntang, ong u Bah Paul halor ka jingpyrshah tamasa ‘Cherry Blossom’ ha ka Sngi U Blei

Syllad | The Rising MeghalayaOctober 18, 2023

U Myntri ka Tant Toursim ka jylla u Bah Paul Lyngdoh haka 18 atrik Risaw u la kynthoh pyrshah halor ki jingmih jong ki jingpyrshah ban pynlong ia ka tamasa “Cherry Blossom” ha ka sngi U Blei da kaba ong man ka sngi ka dei ka sngi kaba khuid kaba kyntang, bad ym kyrpang tang na ka bynta kawei ka sngi ne ka sngi U Blei.

Kane ka jingpynpaw ka jong u ka la wan long hadien ba kawei ka kynhun seng ba la tip kum ka Saindur Tipkur Tipkha Ehrngiew Hynniewtrep (STIEH) ka la phah da ka memorandum sha u Myntri ka tnat Tourism u Bah Paul Lyngdoh da kaba pynpaw pyrshah halor ka jingshim rai ban pynlong ia kane ka tamasa ‘Cherry Blossom Festival’ ha ka sngi U Blei.

Haba kren sha ki lad pathai khubor, u Bah Paul u la ong; “Man ka sngi ka dei ka sngi kaba kyntang bad kaba kordor, bad kam dei tang ba ki briew ki long khuid bad bad shakri Blei tang ha kane ka sngi jong ka taiew bad kylla long ki bym khuid ha baroh kawei pat ki sngi jong ka taiew.

Kane ka tamasa ‘Cherry Blossom’ kan long ha ka 17, 18 bad ha ka 19 (Sngi U Blei) hapoh Bhoirymbong, Ri Bhoi District.

Na ka liang ka sorkar ka la khmih lynti ba kane ka tamasa kan khring ia palat shi lak ngut ki nongwan shangkai pyrthei sha kane ka jylla na ka bynta ban wan shakhi bad iashim bynta ha kane ka tamasa.

Shuh shuh ha kane ka tamasa kin wan iashim bynta ruh ki nongrwai bad ki nongtem ba pawnam ka pyrthei, kaba kynthup ia u Ronan Keating, Pink Panda, Jonas Blue, Hybrid Theory, Kenny Musk nalor kiwei pat.