Maham u Prof Shukla ban pynlong ia ka jingialang Academic Council kaba beain

Syllad | The Rising MeghalayaMay 20, 2025

U Vice Chancellor ka skulbah North Eastern Hill University (NEHU) u Prof Prabha Shankar Shukla haka 19 tarik Jymmang u la maham ba un shim ia ki sienjam kaba donkam lada ka Pro Vice Chancellor ka Prof Sherwin Sungoh kan rai ban pynlong ia ka jingialang jong ka Academic Council ha ka 21 tarik Jymmang.

Katkum ka jingong ka jong u, ka jingpynlong ia ka jingialang jong ka Academic Council ka bym shong ain ka lah ban buh jingma ia ki degree jong ki samla pule.

“Ka jingshim rai jong ka Pro Vice Chancellor ban khot marwei ia ka jingialang ba kongsan ka la wanrah iaka jingkylli halor ka jinglong ain bad ka jingkitkhlieh. Kaba kum kane ka rai da ka Pro VC ka buh jingma shuh shuh ia ka kynrum kynram ha ka rukom pyniaid bad buh jingma ia ki hajar ngut ki samla pule bad ka jinglong shngain jong ki jaka pule kiba la pyniasoh. Lada pynlong ia kane ka jingialang ha ka 21 tarik Jymmang, ngan shim ia ki sienjam kiba donkam,” maham u Prof Shukla.

Haba shim ia ka rai jong ka Prof Sherwin kum ka rai kaba kynrum kynram bad ka bym shongain, u Prof Shukla u la kynnoh ba ka Prof Sungoh ka la pynbna da lade kum ka Incharge VC lyngba ka jingpynbor jong ka NEHUTA, bad kam don ruh ia ka bor katkum ka ain ban khot pynlong ia kaba kum kane ka jingialang hapoh ka NEHU Act bad Statutes. Kano kano ka rai jong kane ka jingialang kan pynmih ia ki dak jingkylli ha kaba iadei bad ki degree jong ki samla pule.

Kham hashwa, u Prof Shukla u la bthah ia u Joint Registrar ba un phah notice na ka bynta ban pynsangeh ia ka jingialang jong ka Academic Council. Hynrei, na ka liang u Joint Registrar um shym la leh ia kane ka jingbthah.

Namar kane ka jingbym leh ei ei, u Registrar Col Omkar Singh (Retd) u la pynmih ia ka notice ban pynlong ia ka jingialang ha ka 23 tarik Jymmang, kata hadien ba la bud ryntih ia baroh ki kyndon.

“Wat hadien kane, u Prof Shukla u la pynmih la ka jong ka notice lyngba u Joint Registrar ban khot ia kane ka jingialang ar sngi hashwa, kata ha ka 21 tarik Jymmang. Kane ka jingleh ka la wanrah ka jingsngewkhia kaba jur ha kaba kiba bun ki shim ba ka dei kaba la leh khlem da ioh bor bad ka dei ka jingpynkhein ia ki rule jong ka University, kaba la kdew shai ba tang u Vice Chancellor uba don ia ka bor ban pynlong ia ka jingialang jong ka Academic Council,” ong u Prof Shukla.

U la bynrap ruh ba katto katbe ki nonghikai kiba la rangbah bad ki riew shemphang ha ka ain ki la kynthoh jur, da kaba maham ba lada ka jingialang ha ka 21 tarik Jymmang kan iaid shakhmat, yn khein ba ka long kaba beain. Kino kino ki rai ba la shim ha kaba kum kane ka jingialang lah ban tuklar ha ka iingkashari bad lah ban ym ithuh ba ki long kiba dei. Kane ka don ka jingktah kaba jur ha ki jingtreikam jong ka skulbah. Ki degree jong ki samla pule kin shah ktah beit beit lyngba kane ka jingialang.

Nalor kata u Prof Shukla u la maham ruh ba ka jingshah ktah lyngba kane ka rai ka lah ban pur shabar jong kane ka skulbah khamtam namar ka NEHU ka dei ka affiliating University jong kiba bun ki college ha Meghalaya bad ki jylla ba marjan.