Maham u Myntri ba baroh kiba pynthohbria ia ka Jylla Meghalaya kin shah pynngat ha ki kyndon Ain

Syllad | The Rising MeghalayaJune 10, 2025

U Myntri ka tnad Tourism u Bah Paul lyngdoh hynne ka sngi Nyngkong u la ong ba baroh kito kiba pynthohbria bad pynbudnam sniew ia ka jylla Meghalaya kin sa shah pynngat ha ki kyndon ain.

Ia kane u la pynpaw hadien ka jingshah kem jong ki sawngut ki briew kiba donkti halor ka jingshah pyniap jong u tourist na Indore u Raja Raghuvanshi ha ka thain Sohra kaba kynthup ia ka kurim jong u ka Sonam Raghuvanshi.

 “Halor ki jingkynthoh pynbudnam sniew ia ka Meghalaya, ka jingbishar da ki lad pathai khubor bad ka jingkawang ktieh ia kiba la pynwan da ki katto katne ki lad pathai khubor na ka liang ka sorkar jylla lyngba ka tnad pulit ka la dep ban mudui da ka ejahar bad ngin iaid ruh da ka lynti jong ka ain ban pynthikna ba kine kiba pynthohbria ia ka jylla Meghalaya kin shah pynngat ha ki kyndon jong ka ain,” ong u Bah Paul haba kren sha ki lad pathai khubor.

Haba pynpaw ba baroh ki jaka jngohkai ha ka jylla ki long kiba shngain, u Myntri u la ong ba ka jingjia shah pyniap jong u Raja Raghuvanshi ka dei ka jingjia kaba nyngkong eh ka ban jia ha ka thain Sohra.

“Kim pat ju don satia ki jingjia ha kaba ki nongwan shangkai kin ngat ha ki jingshah thombor, hynrei haba ki briew ki wan sha kane ka jaka da ka jingthmu ban pyniap iano re kumno ngin lah ban khanglad ia kata ba kan jia bad kine ki dei ki shijur kiba la pyndep ia ka jingiathoh shongkurim bad ba ki don hapdeng ka jingwan shangkai sngewbha. Kumno ngin buddien ia ka leit ka wan jong ki haba ki la kyntait ruh ia ka jingshakri jong ki nongialam lynti ne guides,” u la ong.

U la bynrap ruh ba ka rukom pathai khubor da ki katto katne ki national media ruh ka la pynphai khmat ia ka sorkar jylla.

“Ki la pyniaid ia ki kam bishar lyngba ki kam pathai khubor jong ki ha kine ki taiew ba la dep, bad ha ka jingshisha kiba haiing hasem jong kitei ki shijur ruh ki la kynthoh pyrshah ia ka jylla Meghalaya ha kaba ka la don ruh ka jingjia ba ka la mih ka jingpynshit ba ki dei ban kput pyrshah ia ki nongshong shnong kiba dei na Meghalaya,” u la ong.

Watla katta u la ong ba ka sorkar mardor kan sa bishar bniah ia kine ki jinglong jingman baroh bad ban kyntiew ia ka Standard Operating Procedures (SOP) na ka bynta ka jingshngain ia ki nongwan shangkai.

Haba jubab ia ka jingai jingmut ban buh ia ki CCTV, u Bah Paul u la ong, “Shah ba ngan pynkynmaw ia phi ba ki nongwan shangkai ruh ki wan sha kane ka jaka ban ialehkmen bad ka mariang, ki jinglehkmen ba shimet – kine ki shikurim ki la wan shangkai sngewbha, kumno ngin buh CCTV kat shaba ki leit? Hato kin sngewtynnad ia kata. Ka long kaba lah ia ngi kum ki briew ban buh ia ki kor CCTV ha baroh ki jaka riat ka thain Sohra? Hato ka long mo kaba donkam haduh katta katta.”

Na ka liang u SP ka East Khasi Hills u Bah Vivek Syiem u la ong ba la bthah ia ki homestay, ki hotel ba ki dei ban buh ia ki CCTV namar ba ki long kiba iarap shibun. “Kine ki iarap ia ngi khamtam ha ki jaka kiba jur bha ka jingwan tuid jong ki briew hynrei kan ym long pat kaba lah ban kdup lut ia ki jaka kiba iar. U la ong ia ka jingwad la pynlong ha ka jaka kaba iar palat 150 sq km, kam long kaba lah ha katei ka jaka kaba long riat wat ban don ruh hapoh ka nongbah. Dang shen ngi lah buh 300 tylli ki Camera lyngba ka Smart City, kumta phi lah ban mutdur ba ia ki riat ki lum ban buh ia ki kor CCTV kat haba don. Ngi lah ban kyntu bad bthah ia ki Homestay bad ki Hotel ha kaba ka jingwan ki briew ka jur bha. Ka long kaba iarap bha”.

Ha kaba iadei bad ka jingmudui ejajar, u SP u la ong, “Ki don ki briew kiba na kane ka jylla kiba leit pule shabar, namar ki don ki briew kiba la ong ban leh ia ki kam thombor pyrshah ia ki briew kiba dei na kane ka jaka kiba don shabar. Nga kwah ban iathuh ia phi, ngi lah shim da ka ‘Suo Motu Case’ pyrshah ia utei u briew. Sa kawei pat ka ejahar ka la mih pyrshah ia kito ki briew kiba la shna ia ki khana thok bad ialam bakla. Nga kyrpad ban ym ai ia kano kano ka rai, ne ban pynkut hi da lade, bun ki briew kiba la thaw bad mutdur hi, ngi la shim ia ka case pyrshah ia ki.”

Kham hashwa na ka liang u Bah Paul Lyngdoh ula ai khublei ia ka Meghalaya Police bad ia ki paidbah ka jylla namar kila sngew kumba lait na ka jingkhia ka jingmut jingpyrkhat hadien ba ki pulit kila lah ban lap ia ka daw jong kane ka jingjia bad ka jingshah pyniap jong u Raja Raghuvanshi.

“Kumba nga la pynpaw ha kine ki khyndiat sngi ba la dep ngi ai ka jingshaniah kaba pura ha ka tnad pulit ka jylla kaba kotbor hapoh ka jingialam jong ka DGP bad u SP ka East Khasi Hills bad kane ka jingskhem jingmut kaba ngi lah pynpaw paidbah dang ha kato ka sngi, mynta ka sngi kala urlong bad kadei ka jingjia kaba shai kdar ba ka kynthup ia ka jingiadei jingieit hapdeng jong ki laingut ne ka ‘Love Triangle”. Kadei ruh ka jingjia ba kaba donkti hakhmat eh kala pyndonkam ruh da kynhun runar na ka bynta ban pyniaid shakhmat ia ka jingthmu ba sniew jong ka” ula ong

Ha kajuh ka por u Bah Paul ula ong ba ka Meghalaya kan iai bteng ban pdiang ia ki nongwan shangkai na kylleng ki bynta jong ka ri bad wat ia kiba wan nabar ka ri ruh.