Maham ka VPP wow pynman yakhih yei kam bamsap wa leh ka sorkar MDA

Syllad | The Rising MeghalayaJanuary 8, 2024

U Ardent Miller Basaiawmoit kam u yahkhmat ka Voice of the People Party (VPP) da maham joor u wow pynman i yakhih pyrchah heiyatoh wei mih ki kam bamsap wa da leh da ka sorkar MDA hei yahkhmat ka NPP.

Kat kam ka khubor wa daioh ha ka sngi Bibar 7 Duitara, da ong u Ardent Miller Basaiawmoit, President VPP wa kat kam ki sabut wa daioh ka Sorkar MDA ha kini ki sngi da pyndooh pyndam ko khlem da kut I por ya ki kattu katni ki Ophisar kiwa toh u em hapoh ka Lokayukta kiwa toh u peit u sylli bniah yei sap I tap wei rukom pynlut pynsep ya ka song poisa wa da e hapoh ka Jylla.

Neiliang u Ardent da kynnoh wa ini I leh ka NPP kam ka yahkhmat iong ka sorkar MDA toh iwa thmu wow yada ya ki bru ka NPP kiwa da emkti ha ki kam bamsap wei kam ini i rukom leh toh i wow pynrem joor da waroh ki bru wa chongchnong.

Chooh da ong u leh iow Chief Minister kammon ka Sorkar luchia ko yei kamram ki Ophisar hawa ya ki da thung chynnam hapoh ka Jylla ha ka nongrim wow man ki bru wa laitlooid wow tuklar ya kiwon kiwon ki kam wei wow e ki leh i sylli i bichar wa khooid wa hok yeiwon yeiwon i rukom krehkam.

Kam ka Party wa yien skem ha ka nongrim wow yaleh pyrchah ya ki kam bamsap-bamtuh wa em hapoh ka Jylla, maham u lada ka Sorkar ym wanrah biang ko ya ki Ophisar wa da pyndooh pyndam ko hapoh ka Lokayukta, ym iohsa hap ki u chim da ka luti wow mih sarok wei u pynrem yeini i leh ka Sorkar MDA.