Maham ka Myntri ba ki lad pathai khubor ki don ha ka jingma na ka jinglah ban duhjait

Syllad | The Rising MeghalayaSeptember 8, 2025

Ka Myntri ka Tnad Information and Public Relations ka Dr Ampareen Lyngdoh ka la maham ba ki lad pathai khubor kiba don ia ka tynrai ki don ha ka jingma na ka jinglah ban duh jait noh lada kim lah ban iada ia ka jingioh jingshaniah ka jong ki hapdeng ka jingkiew sted ki rynsan social media, Artificial Intelligence (AI)

Haba kren ha ka jingialang plie ia ka General Meeting ba shisien shi snem jng ka Meghalaya Editors’ and Publishers’ Association (MEPA) ha ka 6 tarik Nailur ha Shillong Club, ka Myntri ka la maham ba ki nongthoh khubor kiba shu mih hi hapdeng ki riew paidbah ki la pynkylla hi ia ki khana bad khring ia ki briew ba kin jngai noh na ki kotkhubor bad ki nongai khubor.

“Kine ki im lyngba ka jinglong dkhot bad ki nongpeit, bad mynta ki la ialeh pyrshah ia ka tynrai jong ka kam thoh khubor kaba tbit,” ka la ong da kaba shim nuksa na ka jingjia shah pyniap jong u Raja Raghuvanshi halor kumno ba ki khubor ba ialam bakla ki la saphrang ha ki rynsan social media da kaba ong tang 30 percent ki jingpynphriang ki long kiba shisha, hynrei kiba sah ki dei ki bym shisha.”

Kumta ka la ban jur ba lymda ki lad pathai khubor ki pynkhlain ia ka rukom pyniaid ialade, ka jingshaniah hi kan sa khyllem noh.”

Halor ka Artificial Intelligence, ka Myntri ka la ong ba ka teknoloji ka dei ka waitlam arliang syrti. Katba ka lah ban iarap ban peit bniah ia ki jingshisha, ka jingpynkylla ktien bad bishar bniah, hynrei ka lah ruh ban ialam bakla shaduh u pud ia kaba ym pat ju sakhi mynno mynno ruh, ka la maham. “Lada ki lad pathai khubor kim lah ban wanrah ka jingkylla, ka buh ka jingma kaba khraw ba kin sa shah bujli noh ha kine ki rynsan ki bym don ain,” ka la bynrap.

Ka Myntri ka la pynthikna ruh ba na ka liang ka sorkar ka dang pyrkhat bha ha kaba iadei bad ki skhim iing na ka bynta ki nongthoh khubor, ki jingkyrshan pisa na ka bynta ki trai kotkhubor, bad ban pynjlan ia ki jingmyntoi ia ki nongtrei ki bym dei ki nongthoh khubor jong ki jaka pynmih kotkhubor. Ka la kubur ruh ia ka jingeh kaba mih na ka jingpynslem ia ki bill jingpynbna (advertisement) da kaba ong ba ka tnad jong ka kan wad ki lad ki lynti ban pynbeit ha kaba iadei bad ki jingsiew.

Katba u Commissioner and Secretary DIPR u Vijay Kumar Mantri u la ong ba ka jingeh kaba kongsan na ka bynta ki nongthoh khubor ha kane ka juk kaba mynta ka long ‘ka jingshaniah pyrshah ia ka jingsted’.’ U la kdew ba katba ki social media ki roi ha ki jingpynbna kiba kloi, hynrei ka jingshaniah ka dei kaba pyniapher ia ka kam thoh khubor ba tbit. Shisien ba ka jingtip kaba bakla ka la saphriang ka jingpynjot kalong kaba neh.

U Director ka IPR u Bah Batlang Sohliya u la pynskhem biang ia ka jingkyrshan na ka bynta ka MEPA.U la pynpaw ba ka jingithuh jaka na ka bynta ka jingthmu ban pyntreikam ia ka skhim shna iing na ka bynta ki nongthoh khubor ka dang don ha ka jingiakren bad pynthikna halor ka jingkyrshan lyngba ki advertisement na ka bynta ki print bad ki rynsan digital kan iai bteng.

Na ka liang u General Secretary ka MEPA u Bah John W. Thabah, u la pynpaw ia ki mat ba kongsan jong ka seng kynthup ia ka jingai jingiada na ka bynta ki non editorial staff, ka jingpynkylla ia ki kyndon jong ka jingpynrung kyrteng (empanel) bad ka jingpynskhem, ka jingpynbeit ryntih ia ki lad pathai khubor lyngba ka tnad IPR bad ka jingkyrshan ba iaid beit iaid ryntih lyngba ki advertisement na ka bynta ki rynsan digital. U la kyntu ruh ia ka sorkar ban wanrah ia ki skhim jingiarap pisa na ka bynta ki nongseng jong ki lad pathai khubor bad na ka bynta ki nongthoh khubor kiban iasyriem kumba long ha Assam.