Maham ka JSU ioh mih ka jingiakynad jaidbynriew namar ki kam iakajia pud ha Block I, II

Syllad | The Rising MeghalayaAugust 18, 2023

Ka Jaintia Students Union (JSU) ka pynpaw ka jingsngewkhia kaba jur ioh ba kan mih ka jingiakynad jaidbynriew namar ka jingiakajia pud bad ki Karbi ha ka thain Block I, Block II.

Na ka liang ka JSU lyngba une u kyrwoh ka la ong ba ki nongialam ka  Karbi Students’ Association (KSA), ki la dei ban kiar ban pynmih ia kino kino ki jingkynthoh kiba lah ban lam sha ka jingkhihwin hynrei ban ailad ia ki paidbah ba kin shim ia ka rai da kaba laitluid.

Ha kajuh ka por ka JSU ka pynshai ruh ba ka Block I kam dei satia kaba hap hapoh u pud u sam jong ki riti synshar ri lane ha kano kano ka jingiamynjur, hynrei ka jingshisha hi ka long ba la weng jubor na ka United Khasi Jaintia Hills namar ki kam synshar khadar ha ka snem 1951.

Kumta ruh ka JSU ka la ong ba ki nongshong shnong ka thain Block I ki don ia ka hok ban dawa ban pynphai pat ia ka thain Jaintia Hills shapoh Meghalaya. Nalor kata, ka seng ka maham ruh ia ki nongialam ka KSA ba kin hap ban shim ia ka jingkitkhlieh lada jia ba min kano kano ka jingiakynad hapoh Meghalaya bad Assam.

Kane ka jingmaham jong ka JSU ka la wan long ruh hadien ba ki nongialam ka KSA haba kren sha ki lad pathai khubor ha ka sngi ba ki Regional Committee jong ka Sorkar Assam bad Meghalaya ki la leit ban iakynduh ha ki thain khappud jong ki ar-tylli ki Jylla ha Khanduli ha ka 16 tarik u Nailar 2023, ki la byrthen ba kan long kum ha Manipur lada ki duh noh ia ki jaka ki puta kiba ki la kam ba ki hap hapoh u pud u sam u jong ki.