Maham ka IMD ban ther u ‘lapbah bad ka lyer ba jur ha kylleng ki District ka Jylla

Syllad | The Rising MeghalayaMay 30, 2025

Ka India Meteorological Department (IMD) ka la pynmih ia ka jingmaham halor ka jingther jong u ‘lapbah, ka jinghap phria, pom pyrthat bad ka jingbeh ka lyer ba jur ha kylleng ki district ka jylla Meghalaya ha ka 30 tarik Jymmang.

Kine ki District kiba hap ha kane ka jingmaham ki kynthup ia ka East Garo Hills, East Khasi Hills, West Khasi Hills, South West Khasi Hills, Eastern West Khasi Hills, East Jaintia Hills, bad West Jaintia Hills.

Katkum kane ka jingbatai lypa ka IMD kane ka jingther u ‘lapbah ka lah ban jia ha ki bynta jong ka East Garo Hills bad East Khasi Hills. Kiwei pat ki district kum ka West Khasi Hills, South West Khasi Hills, Eastern West Khasi Hills, East Jaintia Hills, bad West Jaintia Hills ruh la khmih lynti ba kin sakhi ia ka jingjur slap ha ki katto katne ki jaka.

Namar kata ka Meghalaya State Disaster Management Authority (MSDMA) ka kyntu ia baroh ki nongshong shnong ba kin long kiba peitngor bad shim ia ki lad jingiada. Kane ka jinglong jingman jong ka suinbneng ka lah ruh ban wanrah ia ki jingshlei um, ki jingtwa khyndew, ka jingpom pyrthat, ka jingkhyllem dieng bad ka jingthut ha ki jingai jingshakri ba kongsan kum ha ka liang ka bording ilektrik, jingpynpoi um bad ki lad aijingtip.

La kyntu ia ki nongshong shnong khamtam kito kiba shong ha ki jaka ba sha them lane ki jaka kiba ju jia ki jingtwa khyndew bad ki jaka kiba ki jingtei ki dang iaid shakhmat ba kin long kiba husiar. La kyntu ruh ia ki nongleit nongwan bad kiba thmu ban leit jingleit sha jngai ba kin kiar na ki jingleit ki bym da donkam ha ka por ba jur slap bad ban kiar ruh na kino kino ki jingtrei jingktah kiba dei shabar.

Na ka liang ki bor pyniaid jong ki district bad ki kynhun na ka Disaster Management ki la bishar bniah bha ia ka jinglong jingman baroh. Ki kynhun aijingiarap ba kyrkieh ruh ki la long kiba la pynkhreh bha.

Ka MSDMA ka la aijingmut ruh ia ki paidbah ba kin bteng ban khmih ia ki jingtip kiba iadei bad ki jingpynbna halor ka jinglong jingman ka suinbneng bad ban bud ryntih ia ki jingbthah ba la pynmih da ki bor sorkar ka thain.