Maham ka DHS ban pynshitom lada lap ba ka jingiap ka longkmie armet ka dei na ka jingleh sting

Syllad | The Rising MeghalayaJune 7, 2025

Ka Tnad ka koit ka khiah ka Jylla ka la shimkhia bha halor ka jingiap ba dang shen jong kawei ka longkmie armet hapoh Maternal and Child Health (MCH) Hospital ha Jowai, West Jaintia Hills District bad maham ban leh da kaba tyngeh pyrshah ia kito ki briew kiba donkti lada ka jingtohkit ka shem ba ka dei na ka jingleh sting.

Haba kren sha ki lad pathai khubor haka sngi Thohdieng, ka Director ka Director of Health Service (MCH & FW) ka Dr. NE Kharsahnoh ka la ong, “Ngi sngewsih jur halor ka jingkhlad khlem dei por jong ka Kong (L) Pynche Bareh.Namar la dep ban mudui da ka ejahar bad ba ka jingtohkit da ki pulit bad magistrate ba la khmih bniah da u Deputy Commissioner ka WJH ka la iaid shakhmat na ka liang ka Head Department ka la aiti ia baroh ki jingtip kiba donkam sha ka Inquiry Committee.”

“Ka jingpeit  bniah ia ka daw tynrai ruh ka la iaid shakhmat ban lap ia kano kano ka jingduna ne jingbakla ha ka rukom treikam. Lada ka jingtohkit ka shem ia kano kano ka jingleh sting ne ka jingpulom ha ka rukom aijingsumar yn shim ia ki sienjam kiba tyngeh pyrshah ia kito kiba donkti,” ka la maham.

Ka la bynrap, “Ka Tnad ka pynpaw biang ia ka jingkular halor ka jinglong kaba shai, ka jingkitkhlieh bad ka jingshngain jong ki nongpang bad ngin shim ia ki sienjam ban pynbeit katkum ki jingdonkam ban pynkhlain ia ki kyndon kiba iadei bad ka koit ka khiah jong ki longkmie armet ha kylleng ki jaka aijingsumar paidbah.”

Haba pynpaw ba kane kam dei ka por ban ia kynnoh hynrei ka por ban pyrkhat bad ban pynbha, Ka Dr Kharsahnoh ka la ong, ” Kum ka tnad ngi iai kut jingmut skhem ha ka jingkitkhlieh ban pynthikna ba kum kine ki jingjia ba sngewsih kin ym jia shuh hadien habud.”

Ka DHS ka pyntip ba ka Kong Pynche Bareh na ka shnong Jalaphet ka la leit phah sumar ha MCH Hospital Jowai ha kaba sdang jong kane ka taiew hadien ba ka la shah sumar shwa ha Sutnga PHC.

“Ka la kyntait ban leit sha hospital ha kata ka miet (2 tarik Jylliew). La wanlam ia ka ha ka 3 tarik Jylliew ha ka por 12.45 pm ha kaba la khmih bniah da u doktor ba sumar ia ka. La shem ba ka long kaba koit ba khiah, bad namar ym shym la don kano kano ka dak jingma kaba mardor kumta la buh ia ka hapoh ka jingpeit bniah,” ka la ong.

Hynrei, ka la ong ba ha ka step jong ka 4 tarik Jylliew, la bishar bniah biang ia ka da u doktor uba la pynthikna ba kam pat long kaba donkam kyrkieh ban leh ia ka operation bad la bteng ban peit bniah ia ka.

“Ha ka por 6:20 janmiet ka la ud shitom ka trai kpoh bad la pynkynriah noh ia ka shapoh High Dependency Unit na ka bynta ban khmih bniah bad buddien, hynrei ha ka por 7.15 janmiet uba haiing jong ka nongpang ki la kyrpad ban pyllait noh ia ka bad la pynkynriah noh sha kawei pat ka jaka sumar. Hynrei, katba kane ka jingpynkhreh ban pyllait noh ia ka da u doktor uba don ha ka kam bad aijingmut ruh ia kiba haiing ban pynkhreh da ka ambulance. Hynrei ha ka por 8 baje mynmiet ka jinglong jingman jong ka nongpang ka la sdang kynsan ban hiar arsut ha kaba kam lah shuh ba ring bad pynhiar mynsiem bad um tip briew bad ka jingdon ka oxygen ruh ka la hiar kynsan, kumjuh ka BP ruh ka la hiar..kumta la sdang mardor ia ka jingiarap ba kyrkieh, bad ki doktor ki la pyrshang katba lah ban iarap hynrei ym shym la lah ban pynkylla ia ka jinglong jingman.Kumta la pynbna ba ka la khld noh ha ka por 9:30 mynmiet wat hapdeng ka jingpyrshang borbah ban pyllait im ia ka,” ka la bynrap.

   .