Mad ka Shillong Lajong FC ia ka nam rem ba nyngkong jong ka samoi I-League 

Syllad | The Rising MeghalayaDecember 1, 2024

Ka Shillong Lajong FC ka la mad ia ka nam rem kaba nyngkong ha kane ka samoi jong ka lympung ialehkai I-League 2024-25, ha ka jingiakhun pyrshah ia ka kynhun lahduh barim ka Dempo Sports Club da 2-0.

Ha kane ka jingialehkai kaba kaba la long ha ka janmiet jong ka 30 tarik Naiwieng hapoh ka madan SSA Stadium la sakhi ia ka jingiakhun kaba mar ia biang bor ha kaba ka Lajong kaba la iakhun ha la iing ka la ioh ia ka jingkyrshan kaba pura na ki paidbah nong wan peitkai.

Hynrei u rangialehkai ka Dempo u Pruthvesh Pednekar u la ioh ban pynkhih jar ha ka minit kaba 53, bad hashwa ban kut noh artad u Matija Babovic u la ioh ban thep sa kawei ka kol ha ka minit kaba 90.

Kane ka jingshah rem noh jong ka Shillong Lajong ka la wan long ruh hadien ka jingwanphai sha kane ka lympung da kaba iakhaid ha ka jingiakhun kaba nyngkong pyrshah ia ka Churchill Brothers, kata wat hadien ba ka la shah thep nyngkong haduh 2 kol.

Hynrei, ka long pat kaba sngew bynniaw ba kam shym la lah satia ban bteng ia kane ka juh ka rukom ha kane ka jingialehkai pyrshah ia ka Dempo SC.

Ha ka jingialehkai ka ban wan ka Shillong Lajong kan sa iakhun pyrshah ia ka Inter Kashi ha ka 5 tarik Nohprah ha madan SSA Stadium ha ka por 4:30 janmiet.