Mad biang ka Shillong Lajong ia ka namrem kaba ar da 3-1 pyrshah ia ka Real Kashmir

Syllad | The Rising MeghalayaDecember 17, 2023

Ka Shillong Lajong FC ka la mad biang ia ka namrem ha ka sien kaba ar da 3-1 pyrshah ia ka Real Kashmir ha ka jingialehkai I-League kaba la long kaba ha Srinagar haka16 tarik Nohprah.

Ka Real Kashmir ka la ialehkai bha mar ia sdang ka jingialehkai ha kaba ka la ioh ban pynkhih jar lyngba u rangialehkai pdeng napoh Ghana u Kamal Issah tang ha ka minit kaba 5.

Hadien kane ka Lajong ruh ka la iakhun tyngeh bad mardor ka la ioh ban pyniakhaid tang ha ka minit kaba 16 jong ka jingialehkai ha ka kylla step lyngba u Karim Samb kaba dei ruh ka sien thep kol kaba ar jong u ha kane ka lympung ialehkai.

Kane ka jingiakhun ka la long kaba mar iakhaid da 1-1 kat haduh kaba kut noh jong ka kylla step.

Haba bteng  ia ka jingialehkai ha ka kylla miet, ka Real Kashmir sa shisien pat ka la lah ban jam shakhmat lyngba ka kol ba la thep da u striker jong ka u Gnohere Krizo ha ka minit kaba 55, bad hadien u rangialehkai pdeng jong ka u Mohammad Inam un pynskhem  syndon ban ioh khur ia ka lai  point da kaba ioh ban pynkhih jar biang  ha ka minit kaba 69.

Da kane ka jingshah rem noh, ka Lajong FC mynta ka la don ha ka kyrdan kaba san da 16 point lyngba ki shiphew tylli ki jingialehkai.

Mynta ka Lajong kan wanphai biang sha ka jingialehkai ka ban long ha ka 23 tarik mynta u bnai pyrshah ia ka Namdhari FC ha ka jingialehkai ka ban long ha la iing ha madan SSA Stadium, Shillong.