Lyngba ki ar kol u Khainkupar, jop ka Sawmer iaka Nongrim Hills haka SPL

Syllad | The Rising MeghalayaAugust 21, 2025

Ka kynhun ialehkai ka Sawmer SC ka la lah ba kan pynliem ia ka Nongrim Hills SC da 4-2, ha ka jingialehkai Shillong Premier League (SPL), kaba la long haka 20 tarik Nailar ha SSA Stadium, First Ground Polo.

Ha lyndet jong kane ka jingnlah ka Sawmer ban jop ia kane ka jingiakhun ka la wan hadien ba u Khainkupar Iawphniaw ba la wan mih madan na ka ben shong (substitute) u la lah ban ioh thep ia ki artylli ki kol, kaba ha shwa jong kane, u Diego Khyriem (36’), Khrawkupar Tamu (51) kila lah ban lam khmat ia ka Sawmer SC ban tam shakhmat, ia kaba ka Nongrim Hills SC pat ka la lah ba kan tan shwa shipor sha ka jingiakhaid, ha kaba ka kol ba nyngkong ba ka la ioh ba kan pynphai ka la wan lyngba u Bankitboklang Nongrum (43’) bad bynrap sa ka kol kaba la thep da u Banpynkmenlang Kharsati (76’).

Pynban u Khainkupar, mar sein wan mih madan tang hapoh shiphew minit u la ioh ban thep ia kine ki artylli ki kol, ban pyntikna ia ka kynhun ialehkai ka Sawmer ba kan khur ia ka nam jop.

Kumban shu bynrap hangne ba ha ka jingiakhun sdang jong kine ki artylli ki kynhun ha kane ka samoi ialehkai ba mynta ka SPL, ka Sawmer SC ka la mad ia ka nam rem kaba long da 6-2 hakhmat ka Mawlai SC katba ka Nangkiew Irat SC ka Nongrim Hills da 3-1.

Haba phai sha kane ka jingiakhun, ka Sawmer ka la kham ioh bun bha ki kabu ksiar, hynrei ka la bam por ia ka haduh shiteng kynta ba kan lah ban tam shakhmat lyngba ka kol ba la thep da u Diego, uba dei ruh u snar thep kol ba kynsai tam naka bynta ka kynhun ha ka samoi ialehkai kaba la dep.

Haba shim kyllum kane ka jingiakhun ka long kaba kham shongshit bha, katno tam lei lei hadien ka jingmih madan ka jong u Khainkupar, kaba shiphang u la lah ban pynklumar hi thlim ia ki rang ba ialehkai dien jong ka Nongrim Hills tad haduh ba un da ioh ia ka kabu ksiar ban thep ia ki artylli ki kol.