Lyngba ki ar kol u Freelyson, pynliem ka Laitkor ia ka Mylliem ha ka Shillong Premier League

Syllad | The Rising MeghalayaAugust 28, 2025

Ki ar kol kiba la ioh ban thep da u Freelyson Tariang, ka la biang pura ia ka kynhun ialehkai jong ka Laitkor SC ba kan pynliem ia ka Mylliem SC da 3-1, ha ka lympung ialehkai jong ka Shillong Premier League 2025, kaba la long haka sngi Balang ha SSA Stadium, First Ground Polo.

Ia kine ki ar kol, u Freelyson u la ioh ba un thep ha ka minit kaba 52′, 76′ bad sa shi kol kadei kaba la ioh ban thep da u Risul Malngiang ha ka minit kaba 71, katba ia ka shi kol ka Mylliem SC la ioh ban thep lyngba ka freekick da u Wanbok Wahlang ha ka minit kaba 85.

Haba phai sha ka jingiakhun, tad haduh ba kut ka kylla step, kine ki ar kynhun kim shim la lah ban ia pynkhih satia ia ka jar, hadien ba ka jingiakhun ka long ba baroh ar ki long kiba ia biang bad khlain bor bha.

Kine ki ar kynhun ki la wan rung sha kane ka jingiakhun hadien ba ha ka kylla iakhun ba nyngkong ka Laitkor SC ka la liem noh da 1-0 hakhmat ka Malki SC, katba na ka liang ka Mylliem ka la lah ba kan iakhaid da mar shi kol bad ka Langsning FC.

Hynrei haba wan ban bteng ia ka kylla miet, ka kynhun ialehkai ka Laitkor SC, ka la kyntiew bha ia la ka jong ka rukom ialehkai ka jong ka, bad ka la pyndonkam hok ia ka kabu ksiar kaba ka shem bad iohi ia ka jingduna ne tlot ka kynhun ialehkai ka Mylliem SC, khamtam lei lei ka defend line ka jong ka.

Hadien ba ka Laitkor ka la ioh ba kan thep ia kine ki kol ki jong ka, na ka liang ki player jong ka Mylliem SC, ki la pyrshang ban khie khlieh, kaba hangne la mih paw ki katto katne ki kabu ksiar ia ka ba kan ioh ban pynkhih ia ka jar, hynrei wei bym shim la thaw pat ka sngi, kine baroh ki long lehnohei, hynrei shwa ba ka jingiakhun kan jam sha kaba kut, ka Mylliem ka la ioh ba kan shut ia ka freekick, ha kaba u Wanbok, u la shut bha jai ia ka bol kaba la suh beit ngak shapoh ka kol ka Laitkor bad ir ban khih ka jar.

Da kane ka jingjop, ka kynhun ialehkai jong ka Laitkor ia mynta ka la lait shabar u line saw (relegation zone) hadien ba kan kiew sha ka kyrdan kaba san, katba na ka liang ka kynhun ialehkai jong ka Mylliem ka nam rem kaba hynne ka janmiet, ka pynlong ia ka ba  kan hiar sha ka kyrdan kaba phra.

Ka jingiakhun haka 28 tarik Nailar, kan long hapdeng ka Nangkiew Irat pyrshah ia ka Sawmer SC, ha ka por 4:30 nohphai sngi. Kane ka jingiakhun ka dei artad ka kylla iakhun kaba lai (Rd-3).