Lyngba ka hat trick u Donlad, 6 kol pynliem ka Langsning FC iaka Sawmer SC haka SPL

Syllad | The Rising MeghalayaSeptember 6, 2025

Ki lai kol (hat tyrick) lyngba u Donlad Diengdoh ba la wan ha ka minit kaba 41′, 44′, 59′, ka la biang pura ia ka kynhun ialehkai ka Langsning FC ba kan pynliem da 6-0 pyrshah ia ka Sawmer SC ha ka lympung ialehkai Shillong Premier League 2025 kaba la long ha SSA Stadium ha First Ground, Polo haka 5 tarik Nailur.

Katba ia ki lai tylli ki kol kiba sah la thep pat ia ki da u Nikelson Bina (13′ P), Richie Kharbani (66′) bad Medingroy Makdoh (89′).

Haba phai sha ka jingiakhun, ka Lasngning FC kam shim la kheiñ sting satia ia kane ka jingiakhun pyrshah ia ka Sawmer SC, ha kaba ka la ialehkai beit kumba ka dei namar ba ka tip shai kdar ba da lei lei kam dei ba kan kheiñ sting bad dei ha kum kane ka sur ialehkai, ba ka kynhun ialehkai ka Sawmer ruh, kam shim la lah ba kan shan slem ialade .

Ka kol ba nyngkong ia ka Langsning FC ka la wan ba kan mihpaw ha ka dur ka penalty hadien ba u Donlad u la shah pynur jubor ha uwei na ki player jong ka Sawmer u Khrawkupar Tamu, kaba hangne u Nikelson u la tur shakhmat bad ban pynrung suk ia ka bol sha lyndet jong ka kol.

Hadien kane, dei biang u Nikelson u la shna pynwandur ia ka kynhun ba kan ioh thep ia ka kol kaba ar ban pyllait shakhmat ia ka bol, bad u Donlad daiñ u la ioh ban khyrwit ia ka bol kaba la lah ban sam lyngba ia u rang ap kol jong ka Sawmer u Pyrshangbanbha Dkhar

Ym slem hadien kane, ba u Donlad u la don kham hakhmat ki defender ka Sawmer, ha kaba ka jingbakla ban pass ia ka bol, ka pynlong ia u Donlad ban pynkhih biang sa shisien ia ka jar.

Haba wan ban bteng ia ka kylla miet, u Donlad u la ioh ban thep ia ka kol kaba lai ne hat trick, hadien ba ula kynthih naka bynta ban ioh ioh ban head ia ka bol kaba la wan sha u bad ban pynkhih biang ia ka jar, kaba pynlong ia u kum u rang ialehkai uba ar hadien u Alem Khongwir ka Mylliem ban thep lai kol ne hat trick ha kane ka samoi ialehkai ba mynta jong ka SPL.

Hadien kane, la shem bad iohi ba ki ktang lyer ka kynhun ialehkai ka Sawmer ki la sdang ruh ban stait katno tam lei lei haba ki la shah nion bor bah bha hakhmat ka Langsning ha kane ka kynti iakhun, kaba pynlong pat ia kiwei pat ki rang ialehkai kum ki jong u Richie bad Medingroy ba kin ioh ban thep ia ki kol kiba sah naka bynta ka kynhun.

Da kane ka nam jop, ka Langsning FC joit kan kiew sha ka kyrdan kaba ar, hadien ba ka la ioh ba kan khur 7-point mar ia ryngkat bad ka kynhun ialehkai jong ka Shillong Lajong, tangba ka jingiapher hapdeng kine ki ar kynhun ka long ka jingioh thep kol (goal difference) kaba long +9 la +7, tangba ka Lajong ka dang sah pat ka jingiakhun ha kti.

Katba na ka liang ka kynhun ialehkai ka Sawmer SC, kane ka namrem kala pynlong iaka hap ha u line saw (relegation zone) ba don ha ka kyrdan kaba 9.

Ka jingiakhun haka 6 tarik Nailur, kan long hadpeng ka Nongrim Hills pyrshah ia ka Laitkor SC, kaban long ha ka por 4:30 nohphai sngi.