Load Shedding | Ko ki nongmihkhmat bad sengbhalang shano phi jah?

Syllad | The Rising MeghalayaMarch 20, 2021

Ka jingpynjari biang ha ka khep kaba lai ia ki kynta jong ka jingpynlip ia ka bording ne ia ka load shedding hangne hapoh ka jylla, kala ktah bha ia ka jingim kaba man la ka sngi jong u paidbah katno tam lei lei ia ki khun samla kynthei bad shynrang, kiba don hapdeng ka jingpynkhreh ban iakhun ia ki online eksam ki jong ki.

Kane ka rai pynjari biang ha ka khep kaba lai ia ki kynta pynlip ia ka bording, kam lah ban khlem da pynbitar ia ki riew paw khmat ka jylla, ha kaba uwei na kum kine ki riew pawkhmat ka rilum Jaintia u ma OR Challam, u la wan shakhmat ban ther tyngeh naduh ia ka sorkar, ia la ki nongmihkhmat sha ka iing dorbar thawaiñ bad kumjuh ia ki seng bhalang kiba don bad ba treikam hapoh kane ka rilum.

U ma OR Challam ula pynrem ia ka sorkar ba mynta ka bym pyrkhat satia ia ka jingeh jong ki paidbah kham ia ki samla ba dang don hapdeng ka jing pule kaba mynta kiba bun hi ki hap ban ialeh ia ki eksam lyngba ka online, kaba la ktah haduh katta katta ia ki tang ba ka daw ka jong bymbiang ka light ne ka bording hapoh kane ka jylla.

U Ma Challam u wan shakhmat ban pynpaw ia kane, kadei namar ba hynnin ka sngi Palei bad Thohdieng shu san kynsan, ka ri lum Jaintia ka la shu shong khlem don satia ka bording, kaba la pynlip khlem da ai shwa ia ki jingpynbna paidbah.

Kumta na ka liang u ma Challam u la ong ba lada MeECL ka trei kam khlem leh arsap ia ki nong Jaintia, kan jin da la dei ban pynjari ia ka kynta pynlip bording ne Load shedding ha kajuh ka por ia baroh, namar baroh ki pyndon kam ia ka bording ba wan na ka MeECL ha kajuh ka rukom siew ia ka electric bill man ki bnai.

U ma Challam u la ong “Ko ki nongmihkhmat ba don burom na Jaintia Hills shaei phi don phi leh aiu ia u paidbah. Phi lehkai bad u paitbah nongjied.”

Ia ki nongialam sengbhalang kum ka JSU, FKJGP, JYF, KSU bad kiwei kiwei u kynnoh da kaba ong ba kila ioh thiah bad tip la jia aiu ia ki, hato kila ia dap ia biang mo, da kaba ym  ioh sngew shuh ia ki sur pyrta.

U ma Challam u la pyrta jam naduh ki MLA bad Sengbhalang ba ka por ka la dei iaki ba kin kyndit thiah noh mardor katba dang don ka por.