Liem noh Shillong Lajong ha ka NEUFC da 3-0 ha ka semifinal jong ka Durand Cup

Syllad | The Rising MeghalayaAugust 27, 2024

Wat hapdeng ka jingkyrshan radbah jong ki paidbah, hynrei ka Shillong Lajong ka la shah rem noh da 3-0 ha ka NorthEast United FC (NEUFC), kata ha ka jingialehkai semifinal kaba nyngkong jong ka lympung Durand Cup 2024 kaba la long haka 26 tarik Nailar ha Jawaharlal Nehru stadium.

Ka jingshah thep kaba ar kol ha ka kylla step jong ka jingialehkai lyngba u Thoi Singh bad u rang thep kol na Morocco u Alaaeddine Ajaraie bad ka jingioh ban pynkhih jar biang shwa ban wai ka jingialehkai ha ka kylla miet lyngba u Parthib Gogoi ka la pynlong syndon ia ka NEUFC ha ka sien kaba nyngkong ba kan ioh ban rung sha ka final ha ka Durand Cup.

Ki paidbah kiba don haduh kumba 15,000 ngut kiba bun na ki, ki nongkyrshan trai shnong ki la sngap jar tang hadien 13 minit ba sdang jong ka jingialehkai hadien ba u Thoi Singh u la ioh ban thep ia ka kol kaba nyngkong, kata mar ia pynmih bujli da u Coach Juan Pedro Ben Ali uba dei na Spain bad khamtam hadien ka jingshah thep kol kaba ar lyngba u Aiaraie sa ha ka minit kaba 33 jong ka kylla step.

Watla ka Shillong Lajong ka la pyrshang borbah ban ioh pynphai, hynrei kam shym la iohlad namar ka jingshah banbor ha ki rangialehkai jong ka NEUFC khamtam lyngba u rangialehkai pdeng jong ka u Mohammed Ali Bemammer bad hashwa kaba kut jong ka jingialehkai u Parthib u la ioh ban khyrwit ia ka kol kaba lai ha ka minit kaba 90 +3.