Liem ka Phramer da 7 wicket haka Young Lad’s, rung semi ka Mowkaiaw haka District Cricket League ka WJHDCA

Syllad | The Rising MeghalayaMay 14, 2025

Ka Phramer CC kala shah pynliem da 7 wicket haka Young Lad’s kaba la pynlong iaka ban duh ka lad ban rung sha semifinal jong ka District Cricket League kaba pyniaid da ka West Jaintia Hills District Cricket Association (WJHDCA). Kane ka jingiakhun kala long ha madan Khliehtyrshi haka 13 tarik Jymmang.

Kane ka jingiakhun kadei artad kaba khatduh jong ka jingialehkai league, kaba ka Phramer ka donkam ban jop, hynrei ka jingshah rem noh kala pynlong iaka Mowkaiaw ban ioh rung sha ka semi ryngkat bad ka West Jaintia Police, Mupliang bad Ummulong.

Haba phai sha ka jingialehkai ka Phramer kaba tied shuwa kala kamai 101/10 na ka 19.4 over. U Wantei Ymbon ula synniang 18 run bad u Melan Suchiang 17 run. U Namewanki Pakyntein, nongkawang ball jong ka Young Lad’s CC u la ioh ban khyrwit marwei 3 wickets na ki 4 over, katba u Puraki Shadap bad u Chwamiki Ryngkhlem kila khur 2 wicket.

Ka Young Lad’s kala beh iaka thong da kaba kamai 105 run na ki 14.5 over bad liem 3 wicket.

U Mewada Shylla marwei ula kamai 57 run (khlem out) ryngkat ki 2 ki 6s bad 6 ki 4s kaba la biang pura ia u ban khur iaka nam man of the match.