Leit ujor ka JNC Nongkhlieh sha u SDO ba buh jingma u nar post ilektrik ba la sarang

Syllad | The Rising MeghalayaAugust 28, 2023

Ka Jaintia National Council (JNC), Nongkhlieh Circle, East Jaintia Hills District haka sngi Nyngkong hapoh ka jingialam u president u Nikki Sutnga ka leit ban ujor sha ka ophis treikam u SDO ka MePDCL Khliehriat Div ha kaba iadei bad u nar post ilektrik uba la sarang bad uba buh jingma ia ki paidbah namar u lah ban khyllem noh ha kano kano ka por.

Ka JNC ka la pynpaw ba une u nar post uba la sarang u dei uba don ha ka shnong Moolasngi, Elaka Nongkhlieh, EJHD, bad na ka liang ka seng ka la dawa jur na u SDO ba un phah thung bujli noh mardor da uwei pat khnang ban lait na kino kino ki jingjia ba sngewsih.

Ka JNC lyngba une u kyrwoh ka kyntu jur ruh ia kiba dei peit ia kane ka kam ba kidei ban leit peit khnang ia kum kine ki post kiba la  rim bad ban kylliang noh ia ki khnang ban lait na kino kino ki jingsngewsih kiba lah ban wan jia ha kano kano ka por.

Shuh shuh ka JNC ka la ong ba ym dei ban ap haduh ban da jia shwa kino kino ki jingjia bad ban sa shimkhia bad leh ia kaba donkam, hynrei kaba kongsan hi ka long ban buh shwa ia ka jingim briew ba kordor hakhmat eh.

Ha kajuh ka por ka JNC ka dawa ruh ba dei ban buh shuh ia ki nar post ilektrik sha katei ka Elaka namar dang don bun ki jaka ki bym pat don ki post bad kane ka wanrah jingeh shibun ia ki paid nongshong shnong khamtam ha kine ki sngi ba ka bording ka dei kaba donkam tam ha baroh ki longiing longsem.