Leit jurip u CM ia ka kor kaba pyniakhlad ia ki niut hapoh ka jaka theh niut ha Tura

Syllad | The Rising MeghalayaMay 6, 2024

U Myntri Rangbah ka Jylla u Conrad K. Sangma haka 6 tarik Jymmang u la pynlong ka jingleit jurip halor ka jingpyntreikam ia ka kor kaba pyniakhlad niut ne ka Waste Segregation Machine ha Rongkhon Songgital hapoh sor Tura, West Garo Hills ha ryngkat ka jingiadon lang u Myntri ka Tnat PHE u Marcuise Marak bad u Chairman ka MUDA u Bah Wailadmiki Shylla.

Hadien ba la dep ban pyndait bad pynbit pynbiang ia kane ka mashin yn pyndonkam ia ki kali puh shilum na ka bynta ban khat ia ki niut na ka jaka theh niut ha kaba yn sa pyniakhlad ia ki niut ha ki lai bynta, kata ki niut kiba lah ban pynkylla sboh, ki niut kiba kloi ban kemding bad ki niut ki bym lah ban pynkylla sboh, ki plastik bad kiwei.

Na ka liang u Conrad u la ong ba ia ki niut ki nier yn sa pyniakhlad lyngba ka jingpyndonkam ia ki kor jingstad teknoloji bad ia kiba lah ban pynkylla sha ka sboh na ka bynta ka thung ka tep bad sha kiwei pat ki mar ki mata.

Nalor kata u la kdew ruh ba kine ki kor mashin ki dei kiba la dep ban pyrshang pyntreikam, kata da kaba ai nuksa ruh ha kaba iadei bad ka jaka theh niut ha Marten Shillong bad ka Tinsukia jong ka Assam.

“Ngi kyrmen skhem ba da ka jingpyndonkam ia ka jingstad teknoloji, ngin lah ban pyniaid shakhmat ia kane ka jingthmu ba bha na ka bynta ban leh ei ei ia ki niut ki nier kiba don ha kiwei pat ki jaka theh niut ha kiwei pat ki bynta jong ka jylla,” ong une u Myntri Rangbah ka Jylla.

Shuh shuh u la pyntip ruh ba na ka liang ka sorkar ka la bthah ia baroh ki Tnat Municipal ha ka jylla ba kin pynthikna halor ka jingdonkam ia ka jingpyniakhlad ia ki niut ki nier naduh ki iing ki sem bad ki shnong ki thaw khnang ban pynsuk ia ka rukom lum ia ki niut ki nier ha kine ki sngi ki por ki ban dang wan.

“Ka jinglong jingman jong ka jaka theh niut ha Rongkhon Songgital ka la wanrah ka jingeh kaba khraw ia ki nongshong shnong ka Tura, bad ngi kyrmen ba mar ia pyntreikam ia kane ka project yn sa lah ban weng noh ia kiba bun ki jingeh,” ong u Sangma, da kaba bynrap ruh ba ia kane ka project yn sa sdang pyntreikam noh ha kine ki khyndiat bnai ki ban wan.