Leit jurip ka Myntri ia ka ‘Wellness Centre’ ha Nongmynsong, pynpaw ba donkam ban phaikhmat sha u drok

Syllad | The Rising MeghalayaOctober 16, 2023

Ka Myntri ka Tnat ka koit ka khiah ka sorkar jylla ka Kong Ampareen Lyngdoh haka sngi Nyngkong ka la pynlong ka jingleit jurip ia ka ‘Wellness Centre’ kaba don hapoh ka shnong Nongmynsong haryngkat ka jingiadon lang u MDC ka thain u Bah Fantin J Lakadong, DHS Dr. R. Ally, DM&HO Dr. Shakina Lyngdoh, ki nongialam ka dorbar shnong, ki ASHA bad kiwei kiwei.

Na ka liang ka myntri ha kane ka jingleit jurip ka la pynpaw halor ka jingi donkam ban kyntiew shuh shuh ia kane ka jaka sumar khnang ba kan long ka jingmyntoi ia ki paidbah nongshong shnong bad ki shnong ba marjan.

Ha ka jingkren ka Kong Ampareen ka la pynpaw ba naduh ki snem ba la dep kumba long ha kiwei kiwei pat ki bynta jong ka Nongbah Shillong, ka long kaba donkam ban iatai sani halor ka mat kaba iadei bad u drok uba la saphriang ha ki bynta bapher bapher jong ka nongbah.

Nalor kata ka la pynpaw ruh ba ha kane ka shnong Nongmynsong ruh la donkam ban shim ia ki sienjam ban iatai sani ban kyntiew ha ka liang ka koit ka khiah kumjuh ruh ban lah ban tehlakam ha kaba iadei bad ka jingsaphriang jong u drok bad kiwei pat ki kam bymman kiba mih lyngba une u jingdih ba shyrkhei.

Kumba ka long mynta ka la ong ba kane ka Center ka dei kaba biang ha ka jingdon ki nongtrei kynthup ia ki doktor kiba hap iatreilang ha Rynjah na ka bynta ban aijingshakri ia ki paidbah nongshong shnong jong ka thain.

Shuh shuh ka Myntri ka la pynpaw ruh halor ka jingdonkam ban nang pyniar ha kaba iadei bad ka jingai tika injek na ka bynta ki khynnah, khamtam kito ki bym shym la iohlad ban ai ha ka por jong ka khlad Covid-19.

La shim ruh ia ka rai ban pyniar ia kane ka jingai tika injek kaba long mynta kumba 57% ha kane ka thain baroh kawei, bad la kyntu ruh ia kane ka Center ba kan aijingsumar ruh na ka bynta kiwei pat ki jait jingpang kiba iabit.

Kumjuh ruh la rai ban ban shim ia ki sienjam ban pyniar na ka bynta ban iamir jingmut halor ka jingpang Tuterculosis (TB) da kaba pynleit jingmut lyngba ki jingialap bad ki jingpynshai paidbah khamtam namar mynta kane ka jait jingpang ka dei kaba lah ban sumar.