Leit jurip ka KSU ia ka MCH Hospital Jowai, lap ia shibun ki jingduna

Syllad | The Rising MeghalayaMarch 18, 2024

Ki nongialam ka Khasi Students’ Union (KSU) Jowai Unit ha ryngkat ka jingsynran lang ki nongialam ka KSU West Jaintia Hills District Unit ha ka 15 tarik u Lber ki la leit jurip ia ka MCH Hospital Jowai halor ka jingkynnoh ba ka don ka jingdkoh ha ki jingtreikam jong kane ka hospital.

Kane ka jingleit jurip ka la wan long ruh hadien ba ka KSU ka la ioh pdiang ia ki jingujor na ki paidbah khamtam na kito kiba ioh jingsumar hapoh kane ka hospital.

Ha  katei ka jingleit jurip ka KSU ka la ong ba ka la lap ia shibun ki jingdkoh ha ka rukom trei kam khamtam ka jingduna ki doktor bad kiba bun na ki nongtrei ki dei kiba dang hapoh ka training kiba lehse kan buh jingma shibun ia ki paidbah.

Ha kane ka sngi ka KSU hapoh ka jingialam u President ka KSU Jowai Unit u samla Ewanmi Phawa, u Leki Richard Tyngkan General Secretary ryngkat ka jingdonlang ka kong Ladaplin Hayong President Girls’ Wing ka la ioh lad ruh ban iakynduh ia i Dr. E Chullet ban iakren halor kine ki jingeh.

Ha kane ka jingiakynduh ka KSU ka la ong ba ka la pynsngew sha ki bor ba dei khmih ba kum ka KSU kam lah ban shu sngap halor ka jingud jingnam jong ki nongthiah pang.

Kumta na ka liang ka seng ka la kyntu ia ki bor ba dei khmih ba ki dei ban pynbiang mardor ia ki jingdonkam ha katei ka jaka ai jingsumar khnang ba ki paidbah ba leit thiah pang kin ioh ia ka jingsumar kaba biang khnang ba kan long ka jingmyntoi khamtam na ka bynta kito kiba wan na ki longiing longsem kiba duk ba jynjar.