Leit jurip ka JSU iaka Laskein CHC, hap pyndonkam ki doktor da ka torch light bym biang bording

Syllad | The Rising MeghalayaJune 4, 2021

Ka Jaintia Students’ Union (JSU), Laskein block circle haka sngi Thohdieng kala leit ban jurip ia ka Laskein CHC halor ka jingpynkhreh iaka khlam COVID-19

La ialam da u Dapmain Suchiang president JSU Laskein, Franky Shylla general secretary JSU Laskein bad kiwei kiwei.

Ka jingpynkhreh jong ka Laskein CHC kala iaid shakhmat bad ki dawai ki dashin ban sumar ia ka jingpang COVID-19 ki bym jur eh (mild symptoms) bad ka oxygen dang ioh tang kumba 5 tyndong ryngkat bad ki sut ki but PPE.

Ka JSU kala ong ba kane ka Laskein CHC kaba peit da ki phew tylli ki shnong, ka don tang kawei ka jingthiah ba kyrpang (isolation ward) bad kala kyntu iaka tnad ka koit ka khiah bad phai khmat sha katei ka jaka sumar bad ban pynbiang iaki jingdonkam baroh ban iakhun iaka khlam COVID-19.

Ha kaba iadei bad kiwei kiwei ki jingeh kane ka CHC, ka JSU kala kam ba bun na ki paidbah kiba shah sumar ha kane ka jaka sumar kila ong ba ka bodring ha kane ka jaka sumar ba kam biang bad ka lip khah. Kane ka jaka sumar kam don ruh iaka Generator ban ai jingshai ia kane ka CHC haba thud ka bording.

ka JSU kala ong ba kane ka buh jingeh iaki doktor bad bunsien wa ki doktor ki hap ban pyndonkam da ka torch light bad kane kala wanrah jingsyier iaki nongpang khamta ki longkmie ba pun ba kha.

Ka JSU kala dawa na ka tnad ka koit ka khiah ban pynbiang mar mar iaki jongdonkam khnang ba ka jingdon kane ka CHC kan ai jingmyntoi iaka thain baroh kawei.