Leit jngoh ka Sitharaman iaka jingkieng jri; iaroh ba tyngkai ia ka jingstad jong u mynbarim

Syllad | The Rising MeghalayaJuly 13, 2025

Ka Myntri Pla Tyngka ka Sorkar Pdeng ka Nirmala Sitharaman haka sngi Saitjain ka la leit jngoh ia ka jingkieng jri ba pawnam ha ka shnong Siej, East Khasi Hills da kaba ai ka jingiaroh ia ka jingstad tynrai kaba hiar pateng.

Ka Myntri ka la ioh ruh ban iakren bad ki riew rangbah jong ka shnong, ki nongialam shnong bad ki nongioh jngmyntoi na ka Payment for Ecosystem Services programme ba la kyrshan da ka World Bank, KFW bad ADB ban sngewthuh kumno ki trai shnong ki la tyngka bad pynneh pynsah bad pynthymmai ia ki rukom pyndonkam jong u mynbarim ha kaba iadei bad ka mariang.

Ha ka jingkren jong ka sha ki nongshong shnong, ka Nirmala ka la ai ka jingiaroh kaba khraw halor ka jingstad tynrai kaba la tyngkai pateng la pateng ha Meghalaya.

“Nga ai khublei ia ka shnong baroh kawei kaba la bat ia ka mynsiem ban im hapdeng ka mariang kaba jyrngam. Lah palat shispah snem, phi la pynneh pynsah ia ka kolshor bad burom ia ka mariang bad pynroi ia ka jingiaid lynti kaba neh, wat da kaba shim ia ki sienjam ban pyniasoh sha shiliang jong ki wah khlem da pynkhein ia ki dien kiba im,” ka la ong.

Kumjuh haba pynpaw halor ka jingphylla jong ka jingkieng jri, ka Myntri ka la ong, ” Ha ka por ba ka pyrthei ka dang wad ia ki lad ki lynti kiba lah ban neh, ki nongshong shnong ka Siej ki la pyni ia kaei kaba lah ban long lyngba ki jingpyshang kiba suk kiba iadei bad ka mariang. Phi la shem ia ka lad ban im, ban iaid bad ban roi khlem da pynsniew ia ka sadong sawkun. Ka long kaba phylla shibun kumno ba ki kam jong phi ki lah ban long ki nuksa ia ka pyrthei.”

Ka Nirmala ka la ai khublei ruh ruh halor ka jingpyrshang kaba dang iaid shakhmat jong ki nongshong shnong ban buh jingthoh bad ban wad ia ka jingithuh na ka UNESCO ban aijingithuh kum ki jingtei jong uba rim ia kine ki jingkieng jri.

“Ka jingithuh kam dei satia na ka bynta ka jingsngew khyllew, hynrei kaba pyni sha ka pyrthei ba phi dei kiba leh nyngkong eh.Ki jingleh ki jong phi ym tang ba ki long kiba seisoh hynrei kiba lah ban pynbud. Ka jingithuh da ka pyrthei kan iarap ban ai mynsiem ia kiwei ruh kumjuh,” ka la bynap.

Kane ka jingleit jngoh ka pynpaw ruh halor ka jingkular jong ka Sorkar India ban kyrshan ia ki lad ki lynti kiba pynshong nongrim halor ka mariang, ka jingsumar ba ialam da ki nongshong shnong bad ka jingithuh ia ki jingtip tynrai jong ka India ha kaba iadei bad ka mariang ha ki rynsan jong ka pyrthei.