Leit iuhkjat u CM ha ka shnong Pahamjula, Ri Bhoi, kular ban kyntiew ia ki kam pynroi

Syllad | The Rising MeghalayaMay 23, 2025

U Myntri Rangbah ka Jylla u Conrad K Sangma, haka 22 tarik Jymmang u la leit iuhkjat ha ka shnong Pahamjula kaba hap hapoh Jirang constituency of Ri Bhoi District kum shibynta jong ka prokram CM-Connect. 

Kane ka jingleit ka la wan long ruh hadien ka jingkyrpad na ka liang ki nongshong shnong ban tuklar lem na ka bynta ban maramot ia u transformer bording uba la sniew mynta lah kumba 18 snem. Kane ka shnong kaba don 77 tyli ki longiing ka la shong hapdeng ka jingdum hadien ka jingbthei jong une u transformer naduh u snem 2007. 

Lyngba ka jingtuklar ba mardor jong u Myntri Rangbah la lah ban maramot ia une u transformer bad ki nongshong shnong ki la ioh ia ka bording ilektrik tang ha ki lai sngi. Na ka liang ki trai shnong hapoh ka jingialam jong u MLA ka thain u Bah Sosthenes Sohtun ki la ioh ia ka lad ban wan iakren ia u Myntri Rangbah ha ka sngi Thohdieng ba la lah.

Mar ia wan poi ki nongshong shnong ki la pdiang sngewbha ia u Myntri Rangbah ban pynpaw ia ka jingsngew nguh, bad pynpaw ba ka jingshim khia ka jong u ban pynioh pat ia ka bording ilektrik ka long kum ka jingpyllait ia ki na ka dujok, kata da kaba kdew halor ka jingshah iehnoh bein kaba ki la mad ha kine ki snem kiba la leit noh.

Na ka liang u Myntri Rangbah u la kubur halor ka jingshah iehnoh bad kular ia ki nongshong shnong ba ka jingshimkhia halor ki jingeh jong ki nongshong shnong kan dei ka jingkitkhlieh jong ka sorkar. “Kaba kum kane ka jingiehnoh bein ka dei ka bym lah ban pdiang,” u la ong. “Kan dei ka jingkitkhlieh ka jong ngi ban shah shkor bad weng ia ki jingeh kiba ki briew jong ngi ki iakynduh.”

Kane ka jingleit iuhkjat ka pynpaw ruh ia ka jingkut jingmut jong ka sorkar ban wanrah ia ki kam pynroi sha ki shnong kiba don ha ki thain kiba kyndong bad ban weng ia ki jingeh kiba ki briew ki iakynduh ha ki thain kiba pajih.”

U Myntri Rangbah u la pynpaw ia ka jingsngew hun halor ka jingioh lad ban iakynduh markhmat ia ki nongshong shnong ha Pahamjula. “Ka dei kaba rit hynrei kaba don jingmut bad ka dei ka khyllipmat kaba kmen na ka bynta jong nga ban don hangne bad ki nongshong shnong jong ka Pahamjula,” u la ong.  

Na ka liang u MLA ka thain ka Bah Sosthenes Sohtun u la pynpaw ka jingsngew nguh ia u Myntri Rangbah halor kane ka jingwan iuhkjat ka jong u ha kane ka shnong bad ruh halor ki sienjam kiba u la shim na ka bynta ban kyntiew ia ki kam pynroi hapoh ka constituency khamtam ha kaba iadei bad ka surok NEC kaba pyniasoh na 9 Mer sha Umsan kaba la pynduna shibun ia ka por ha ka leit ka wan.